Элдэв асуудлуудад орооцолдож байсан МАН-ын “зүтгэлтэн” Ц.Бат-Энх “Эрдэнэт” үйлдвэрийн дэд даргаар томилогдоод удаагүй байгаа. Түүнийхээ дараахан Монголын боксын холбоо удирдлагуудаа шинэчлэхэд “Эрдэнэт”-ийн шинэхэн дэд дарга тэрбээр мөн л боксын холбооны дэд ерөнхийлөгчөөр сонгогдсон.

Харамсалтай нь удирдлагаа шинэчилсэн боксын холбоо мордохын хазгай болж, маргаашаас нь хэл ам дагуулах болсон. Гавьяат тамирчин Э.Цэндбаатартай холбоотой дуулиан шуугиан намдаж амжаагүй байхад Монголын боксын холбоог тойрсон элдэв шуугиан ар араасаа гарч ирсээр л байна. Үүний нэг нь удирдлагаа шинэчлээд удаагүй байгаа Монголын боксын холбооныхон Серби улсад зохиогдож байгаа насанд хүрэгчдийн Дэлхийн аварга шалгаруулах тэмцээнд ойрын хэдэн жилдээ үзүүлээгүйгээрээ муу тулалдлаа.

Харин эсрэгээрээ тамирчдыг дагаж явсан, өөрөөр хэлбэл хөгжөөн дэмжигчид нь мөн л ойрын хэдэн жилдээ байгаагүй өнөр бүрэлдэхүүнтэй явсан байдаг юм. ДАШТ-нд оролцох Монголын багийг “Эрдэнэт” үйлдвэрийн дэд дарга, Боксын холбооны дэд ерөнхийлөгч Ц.Бат-Энх ахалж явсан бөгөөд тэдэнтэй цуг Боксын холбооны Удирдах зөвлөлийн гишүүдээс гадна “Эрдэнэт” үйлдвэрийн 30 орчим ажилтан явжээ.

Шигшээ багийн тамирчдаас гадна “хөгжөөн дэмжигч” эдгээр хүмүүс Сербийн Белгарад хотноо арав гаруй хонож, тэмцээн үзжээ. Эх сурвалжийн хэлснээр тэдний зардлыг “Эрдэнэт” үйлдвэрээс гаргасан байх магадлалтай бөгөөд 30 хүний замын зардал, буудлын төлбөр гээд тооцвол энэ нь нэлээд өндөр дүн гарах нь мэдээж. ДАШТ-ий үеэр “Mongolia, Mongolia” хэмээн орилуулахын тулд арай л өндөр үнэ төлсөн байгаа биз?

Б.Жаргал