Дэлхийн хамгийн өндөр хөгжилтэй орны нэг АНУ-руу явах хүсэлтэй монголчууд олон бий. Гэхдээ сайны хажуугаар саар гэгчээр тэнд очсон монголчуудын амьдрал наанатай, цаанатай. Ажил хийж, толгойгоо цэнэглэж байгаа нэг хэсэг байхад хүний нутагт  хэцүү амьдарч яваа монголчууд бас байна.

   АНУ-ын Денвер хотод амьдардаг Батмөнхийн Ариунаа гэдэг нэгэн монгол бүсгүй монгол ахан дүүсээсээ хандив тусламж, сэтгэлийн дэмжлэг хүсч байна. Тэрбээр анх 2003 онд гэр бүлийн хамт АНУ-д иржээ. Анх очсон цагаасаа "шалны" гэж нэрлэдэг цэвэрлэгээний ажил хийсэн байна. 2008 онд бага охиноо төрүүлэхэд нь нөхөр нь нутаг буцжээ. Харамсалтай нь нөхөр нь жилийн өмнө нас барсан тухай мэдээ Монголоос ирсэн байна. Харин түүний араас 2004  онд АНУ-д ирж мөн л "шалны" ажил хийж байсан ах Б.Бат-Эрдэнэ нь 2011 оны 12 дугаар сард ажлаа хийх үедээ гэмтэл авсны улмаас баруун хөлнийхөө өвдөгний доод хэсгээрээ тайруулжээ. Тиймээс Б.Ариунаа ахыгаа асрах хэрэгтэй болж, сүүлийн 11 сар Колорадо мужийн Аурора хотын гэр оронгүйчүүдийн асрамжийн газарт  амьдарч байна. Ахынх нь бие муудаж, байнгын асаргаа шаардлагатай болсон тул сүүлийн гурван сар ямар ч ажил хийгээгүй гэнэ. Харин өмгөөлөгч нь Б.Бат-Эрдэнийг ажил дээрээ биш, өөрийн хууч өвчнөөсөө болж хөлөө тайруулсан хэмээн мөнгө, нөхөн төлбөр өгөөгүй аж.
  Ийнхүү Б.Бат-Эрдэнэ хөдөлмөр эрхлэх чадваргүй болсноос гадна чихрийн шижин өвчин нь бөөрөндөө нөлөөлж, биеийн байдал тун муу байгаа тул дүү нь ойрын хугацаанд Монгол руу буцахын тулд элэг нэгт монголчуудаасаа тусламж хүсч байна.

  Б.Ариунаа нь 4, 15, 16 настай гурван хүүхэдтэй. Ээж нь ахыгаа асарч тэднийг тэжээж чадахгүй болсон тул хүүхдийн асрамжийн газарт толгой хорогдож байгаа юм. Тэд ээжтэйгээ долоо хоногт ганцхан цаг уулзах эрхтэй. Ийм нэгэн монгол эмэгтэй гэр бүлийн хамт нутаг руугаа буцах зардал хайж байна. Одоогоор АНУ-д байгаа монголчуудын холбоод түүнд тусална гэдгээ амлаад байгаа юм.