Түүхэндээ хоёр удаа парламент, орон нутгийн сонгуульд олонхи, Ерөнхийлөгчийн дөрвөн сонгуульд ялагч болж байсан АН-д хамгийн олон ялалтыг нь намын дарга асан Н.Алтанхуяг авчирч байсан юм. Гэсэн ч АН олонхи байх үедээ түүний Засгийн газрыг бүрэн эрхийн хугацаанаас нь өмнө сөрөг хүчинтэйгээ нийлэн огцруулж байлаа. Энэ өдрийнх нь долоон жилийн ой өнөөдөр тохиож байна. Энэ өдрөөс хойш АН намын тамгагүй Ерөнхий сайд, Ерөнхий сайдын суудалгүй намын даргатай жил гаруй хугацааг үдээд парламентын ээлжит сонгуультай золгосон. Хуйвалдаанаар өөрийн намын Засгийн газраа огцруулж, намын тамгаа Н.Алтанхуягаас авснаасаа хойш АН Тамгагүй Ерөнхий сайд, сэнтийгүй намын дарга хоёртойн зовлонг хангалттай амссан.

Хамгийн рейтинг өндөртэй байсан Засгийн газраа унагаж, намын даргаа шилжүүлсэн АН түүнээс хойш УИХ-ын хоёр сонгууль, орон нутгийн хоёр сонгууль, нөхөн хоёр сонгууль, Ерөнхийлөгчийн нэг сонгуульд ялагдаад байгаа юм. Н.Алтанхуягаас намын тамгаа авахдаа З.Энхболд “Н.Алтанхуяг бол хамгийн хамгийн гэсэн тодорхойлолттой хүн. Тиймээс хамгийн түрүүнд энэ хүнд хандан үг хэлье. Н.Алтанхуяг гэдэг улстөрч бол АН-д хамгийн олон жил намын дарга хийсэн. Бас АН-ын түүхэнд хамгийн олон ялалтыг авчирсан. Үүнээс гадна хамгийн сайн эв нэгдлийг сахигч улстөрч. Тийм учраас энэ хүн намынхаа эв нэгдлийг сахиулахын тулд намын даргынхаа албаа өнөөдөр өгч байна” гэж байсан юм. З.Энхболдын хэлснээр намынхаа эв нэгдлийг хангахын тулд Н.Алтанхуяг намын даргын тамгаа өгч байсан боловч харамсалтай нь АН ахин нэгдэж нийлж чадалгүй энэ өдрийг хүргэж байна. Хоёр тамга, хоёр даргатайгаар үйл ажиллагаа үргэлжлүүлэх болсон АН-ын хувьд өнөөдөр Онц их хурлаа хийж байна. Онц их хуралд 1318 төлөөлөгчөөс 1258 төлөөлөгч оролцсон юм. Б.Цогтгэрэлийн АН тодотголтойгоор хийж байгаа энэ хуралд намын удирдлагад байсан хүмүүс илтгэл тавьж үг хэлсэн юм. АН-ын дарга асан, Ерөнхий сайд асан Н.Алтанхуяг, “Дээд шүүх ямар нэгэн намыг бүртгэх л ажил хийхээс биш, зөвшөөрлийн систем рүү оруулж болохгүй. Өнөөдрийн хурлаас харахад АН нэгээрээ, цулаараа байгаа гэдэг нь харагдаж байна. АН-ыг улам хагаралдуулах санаа Ардын намд байгаа боловч жирийн мянга мянган гишүүд цулаараа байгаа шүү” гэлээ. Харин Ерөнхийлөгч асан Ц.Элбэгдорж, “Монгол төрөөс АН-ынхан явж, ялагдаж болно. Харин Монгол Улсаас ардчилал, эрх чөлөө явахгүй. МАН сонгуульд ялж сурсан байна. Гэвч тэд ардчилсан арга замаар улсыг удирдаж сураагүй байна. АН-ын дарга хэн байхыг шүүх шийдэхгүй. Ардын нам ч шийдэх ёсгүй. АН-ын гишүүд, намын олонхи та нар шийдэх ёстой” гэсэн юм. Харин УИХ дахь АН-ын бүлгийн дарга Д.Ганбат, “Ийм хүчтэй АН-ын бүлгийн дарга байгаадаа бахархаж байна” гэсэн бол Нийслэлийн АН-ын дарга асан Э.Бат-Үүл “залуусын цаг ирсэн, та нарыгаа хоёр гараа өргөөд дэмжинэ. АН-ыг дарга удирдах гээд байсан учраас хагаралдсан. АН-ыг дарга биш, манлайлагч удирддаг юм” гэсэн юм. АН-ын дарга О.Цогтгэрэлийн хэлснээр АН энэ Онц их хурлаараа цаашдын хувь заяагаа шийднэ.

С.Сүлд