Өчигдөр МБӨ-нд Гиннесийн барилдааны нэг жилийн ойд зориулсан хүчит 192 бөхийн барилдаан болов. Мөн л нээлтийн барилдааны адил бөхийн тоо тийм ч хангалттай бус байв. Аймгийн заануудыг нэгийн даваанд гоц мөргүүлж, Аварга дээд сургууль, болон 102 дугаар дунд сургууль, Найдвар сургуулийн сурагч оюутнууд нэгийн давааны эхний дүйзүүдийн аманд гарсан юм. Улсын алдар цолтой 19 хүчтэн зодоглосон. 14 сумын заан нэг давж хоёрын даваанд гарсан бол Говь-Алтай аймгийн Төгрөг сумын харьяат шинэ аймгийн начин Галбадрахын Гантулга Б.Сумъяа начингаар хоёр давж гурвын даваанд нутгийн гарьдад унасан юм.  Нээлтийн барилдааны түрүү бөх Р.Пүрэвдагва хоёрын даваанд Ховдын Тайван начингаас барьц сонгоод унав. Энэ давааны төгсгөлд Хэнтийн Э.Оюунболд, Архангайн М.Бадарчтай таарч Хэнтийн залуу арслан бярдсаар давсан. Гурвын даваанд улсын харцага Э.Батбаатарыг ойрын барилдаануудад зодоглоогүй Хэнтий аймгийн заан Рэгдэлийн Анхбаатар давжээ. Мөн улсын начин Л.Гантулга Өвөрхангайн Т.Ядамсүрэн начинд тахим буулгав. Улсын начин Амарын Батмөнх энэ даваанд 19 бөхөөс Хэнтийн Э.Оюунболдыг амлаж барилдаад удтал хүч үзэж, давааны төгсгөлд үлдэн барьц сонгооноос хаялцсан. Тун сонирхолтой өрнөсөн тус барилдааны бичлэгийг манай сайт тун удахгүй та бүхэндээ хүргэх болно. Л.Шинэбаатар Н.Батсуурь нар яльгүй маргаж, Л.Лха-Очир арал илүү Б.Эрдэнэхүүг хавирч, Л.Цэрэнтогтох Н.Батсайханыг бярдаж тус тус давсан. Л.Цэрэнтогтох арслан үнэхээр сайн байгаагаа харуулсан. Тэр Архангайн Ц.Ганбат начингаас авхуулаад П.Ганхүү, Б.Амарзаяа нарын сайчуултай үзсээр зургаад шалгарсан юм.

 Харин дөрвийн давааны оноолтод их ойн жилийн начингууд унаж дууссан юм. Б.Гончигдамба Н.Батсуурьт, Б.Батмөнх Л.Лха-Очирт, Б.Сангисүрэн Т.Баасанхүүд, М.Эрдэнэбат Бо.Батжаргалд, А.Батмөнх Ш.Шинэбаярт тус тус унаж Б.Амарзаяа л Ц.Одбаяраар давж тавын даваанд гарсан юм. Өвөрхангай аймгийн начин Төрбатын Ядамсүрэн Амартүвшин харцагаар дөрөв давж тавын даваанд Ж.Бат-Эрдэнэ гарьдын аманд очиж багагүй тэвдүүлээд шороодсон.

 Сүүлийн зургаад улсын гурван цолтон, аймгийн гурван арслантай шалгарав. Ж.Бат-Эрдэнэ Л.Цэрэнтогтохыг хонгодож, Ц.Содномдорж Л.Лха-Очирыг давхар шуудагнаас түрж, Э.Энхбат Н.Батсуурийг баруун талдаа хөмөрч тус тус давсан. Ингэснээр есдүгээр сарын 14-нд Олимпийн хос медальтан Н.Түвшинбаярын наадамд их шөвөгт шалгарсан дөрвөн бөхийн гурав нь Гиннесийн барилдааны их шөвөгт шалгарчээ. Ж.Бат-Эрдэнэ гоц мөргөж, харцага начин хоёр учраа таарсан. Харин энэ удаа начин солгой талдаа хөмөрч тэргүүн байрын төлөө шалгарсан.  Тэргүүн байрын төлөө гарьд начин хоёрын барилдаан удаан өрнөсөнгүй. Гарьдын дутуу хийсэн мэхэн дээр начин сөрж дайрч давснаар дэлхийн дээд амжилтын нэг жилийн ойд түрүүлэв.

Дөрвийн даваа

1. Ж.Бат-Эрдэнэ у.г - Б.Хаш-Эрдэнэ а.н

2. Т.Амартүвшин у.х - Т.Ядамсүрэн а.н

3. Ц.Содномдорж у.х - Д.Анхбаатар а.з

4. Э.Энхбат у.н - Д.Амарсайхан а.а

5. Б.Гончигдамба у.н - Н.Батсуурь а.а

6. Ду.Батбаяр у.н - Н.Ганзориг а.а

7. П.Ганхүү у.н - Л.Цэрэнтогтох а.а

8. Б.Батмөнх у.н - Л.Лха-Очир а.а

9. Б.Сангисүрэн у.н - Т.Баасанхүү а.а

10. М.Эрдэнэбат у.н - Бо.Батжаргал а.а

11. А.Батмөнх у.н - Ш.Шинэбаяр а.х.а

12. Б.Амарзаяа у.н - Ц.Одбаяр у.н

Тавын даваа

1. Ж.Бат-Эрдэнэ у.г -Т.Ядамсүрэн а.н

2. Ц.Содномдорж у.х - Т.Баасанхүү а.а

3. Э.Энхбат у.н -Н.Ганзориг а.а

4. Б.Амарзаяа у.н -Л.Цэрэнтогтох а.а

5. Ш.Шинэбаяр а.х.а -Н.Батсуурь а.а

6.Бо.Батжаргал а.а - Л.Лха-Очир а.а

Зургаагийн даваа

1. Ж.Бат-Эрдэнэ у.г - Л.Цэрэнтогтох а.а

2. Ц.Содномдорж у.х - Л.Лха-Очир а.а

3. Э.Энхбат у.н - Н.Батсуурь а.а

Долоогийн даваа

1.Ж.Бат-Эрдэнэ у.г -гоц мөргөв

2. Ц.Содномдорж у.х - Э.Энхбат у.н

Наймын даваа

1. Ж.Бат-Эрдэнэ у.г - Э.Энхбат у.н