2.7 сая хэрэглэгчтэй гэх “Хаан банк”-ны 60 хувийг хувьчлах асуудлын талаар Төрийн ордонд халуун яриа өрнөж байна. Гэхдээ энэ талаар ам нээсэн УИХ-ын гишүүн гэвэл ердөө гурав байгаа нь Ч.Хүрэлбаатар, Г.Амартүвшин, Т.Доржханд юм. Уг нь цагаа олсон зөв шаардлага байлаа. Гэхдээ тэднийг энэ асуудлаар зөвхөн үг хэлснийх нь төлөө нэг хэсэг нь хардаж, нөгөө хэсэг нь чичлэх юм билээ. Харин бусад гишүүдийн хувьд энэ асуудлаар ус балгасан мэт таг байгаа нь хачин. Уг нь манай улсын хүн амын талаас илүү хэрэглэгчтэй тус банкны ирээдүйг хэрхэх талаар ид ярилцаж байдаг.  

Хаан банкны хувьчлал тойрсон асуудлаар УИХ-ын гурван гишүүн юу хэлэв. 

Ч.Хүрэлбаатар: Би ХААН банкны 60 хувийг хэн авав. Цэвэр мөнгө үү гэж асуусан. Гадаадууд авах гэж байгаа гэсэн. Гадаадууд авах юм бол дотоодууд над руу дайраад байдаг учир юу вэ? Хөлсний хэдэн “мояа” толгойлоод дайрч байна.

Г.Амартүвшин: ХААН банк санхүүгийн зах зээлийн дангаараа 40-өөс илүү хувийг эзэмшдэг. Худалдаа хөгжлийн банкны эцсийн эзэмшигч нь ХААН банкны хувьцааг худалдаж авсан бол Банкны тухай хуулийг зөрчиж байгаа юм биш үү. Банкны нөлөө бүхий хувьцаа эзэмшигч өөр банкны хувьцаа эзэмшигч байхыг хориглоно гэсэн хуулийн заалт бий.

Т.Доржханд: Хаан банкны дийлэнх хувийг “49%+Ж” гэдэг бүлэглэл төрийн мөнгөөр авч байгаа талаар мэдээллүүд ирж байна. Банкны салбарыг шинэчилж, санхүүгийн салбарыг эрүүлжүүлэх талаар эхлүүлсэн ажлаа гүйцээнэ. Санхүүгийн салбар дахь гар хөлийг нь тайрч, хуулийн хариуцлага шаардана.

Б.Жаргал