М.Тулгат даргатай Ардчилсан намаас Онц их хурлын талаар тайлбар хийлээ. Энэ үеэр М.Тулгат хэлэхдээ “Ардчилсан намын Онц их хурал энэ сарын 5-нд болж, манай намын гишүүд монгол орны өнцөг булан бүрээс намынхаа асуудалд санаа зовж, хуран чуулсан байгаа. Манай намаас мэдэгдэл гаргасан. Энэ байр суурь дээрээ байгаа. Нэг бүдэрвэл долоо бүдэрнэ гэдэг. Өнөөдөр үүсээд байгаа зүйлийг шийдэхийн тулд маш нухацтай, алдаа мадаггүй, сэвгүй гаргахын тулд бүх зүйлийг дүрмийн дагуу хийх ёстой юм. Нөгөөтэйгүүр Ардчилсан намд үүсээд байгаа нөхцөл байдалд намын нэг хэсэг нөхдүүд тухайн хурлыг хүлээн зөвшөөрөхгүй гэсэн байр суурьтай байгаа энэ үед бид тал талаасаа хамтарсан ажлын хэсэг гаргаж, талуудынхаа оролцоог жигд хангах ёстой. АН олон нийтийн дэмжлэгтэй хэнийг ч хамаагүй намдаа нэгтгээд ялалт байгуулъя, олонхийг бүрдүүлье гэж ажиллаж ирсэн. Энэ нь намаа жанжин шугамгүй, хогийн сав шиг болгосон. АН-ыг идээд явж байсан С.Ганбаатар мэтийн хүмүүс Их хуралд нь оролцоод индэр дээр зогсож байна гэдэг гутамшиг. Гэхдээ АН эв эеэ олно гэдэгт итгэлтэй байна” гэв.