Эрүүл мэндийн сайд Н.Удвал Бүгд Найрамдах Куба улсаас манай улсад суугаа онц бөгөөд бүрэн эрхт Элчин сайд хатагтай Мария Ортенсия Феблис Мирабал-ыг Монгол Улсад ажиллах хугацаа нь дуусч байгаатай нь холбогдуулан хүлээн авч уулзлаа.

Эрүүл мэндийн сайд Н.Удвал Бүгд Найрамдах Куба улсаас манай улсад суугаа онц бөгөөд бүрэн эрхт Элчин сайд хатагтай Мария Ортенсия Феблис Мирабал-ыг Монгол Улсад ажиллах хугацаа нь дуусч байгаатай нь холбогдуулан хүлээн авч уулзлаа. Уулзалтын эхэнд Элчин сайд хатагтай Ортенсия эрүүл мэндийн салбар дахь Монгол-Кубын харилцаа, хамтын ажиллагаанд гарсан ололт амжилт, хийгдсэн ажлуудыг дурьдаад энэ салбар нь хоёр улсын хамтын ажиллагааг өргөжүүлэн хөгжүүлэх хамгийн тохиромжтой салбарын нэг болохыг онцлон тэмдэглэв. Цаашид монголын эмч, эмнэлгийн мэргэжилтнүүдийг сургах, хамтарсан сургалт, семинар зохион байгуулах, Куба эмч нарыг нарийн мэргэжлийн чиглэлээр, ялангуяа нүдний нарийн төвөгтэй мэс заслын чиглэлээр Монгол Улсад ажиллуулах, байгалийн гаралтай эмийн бүтээгдэхүүнийг нэвтрүүлэх зэргээр хамтын ажиллагааг улам өргөжүүлэх боломжтой болохыг мэдэгдлээ. Мөн Куба улсын Засгийн газрын тэтгэлгээр нийт 140 гаруй монгол оюутан суралцаж төгссөний нэлээдгүй хувийг ерөнхий анагаах ухаан, нүүр ам судлалын чиглэлээр төгсөгчид эзэлдэг ба одоогоор шинээр байгуулагдсан Латин-Америкийн дээд сургуульд нийт 7 монгол оюутан суралцаж байгааг хэллээ.
Сайд Н.Удвал эрүүл мэндийн салбарт хоёр улсын хамтын ажиллагаа арвин баялаг туршлагатай болохыг онцлон тэмдэглэж, Куба улсад төгссөн эмч нар салбартаа тэргүүлэх эгнээнд явдагт бахархалтай байдгаа илэрхийлэв. Мөн эрүүл мэндийн дэд сайдаар ажиллаж байх үедээ Монгол-Кубын Засгийн газар хоорондын комиссын даргаар ажиллаж байсан ба Куба улсын биотехнологи, анагаах ухааны сургалт өндөр түвшинд хүрснийг хүлээн зөвшөөрч, цаашид Монгол-Кубын хамтын ажиллагааг өргөжүүлэн хөгжүүлж, шинэ шатанд гаргахад анхааран ажиллахаа мэдэгдсэн юм.