УИХ өнгөрсөн баасан гарагт ирэх оны Төсвийн тухай хуулийн төслийн эцсийн хэлэлцүүлгийг хийж баталсан. Уг төсөлтэй хамтад нь өргөн барьсан Засгийн газрын бүтэц, бүрэлдэхүүний хуульд нэмэлт өөрчлөлт оруулах тухай хуулийг ч мөн энэ өдөр баталсан. Ингэснээр ирэх онд Засгийн газар бүтцэд Эдийн засаг, хөгжлийн яам, Цахим хөгжил, харилцаа холбооны яам гэсэн хоёр яам нэмэгдэж байгаа бол, бүрэлдэхүүнд Эдийн засаг, хөгжлийн сайд, Цахим хөгжил,харилцаа холбооны сайд нар орж ирэхээр болж байна. Засгийн газрын бүтэц болон бүрэлдэхүүний тухай хуульд нэмэлт өөрчлөлт оруулснаар Төрийн захиргааны байгууллагын тогтолцоо, бүтцийн ерөнхий бүдүүвчийг шинэчлэн батлах тухай УИХ-ын 2020 оны долдугаар сарын 7-ны өдрийн тогтоолын хавсралтад мөн өөрчлөлт орж байгаа. Энэ хавсралтаар баталсан  Төрийн захиргааны байгууллагын тогтолцоо, бүтцийн ерөнхий бүдүүвчийн наймдугаар дахь Харилцаа холбоо, мэдээллийн технологийн газар, есдүгээр дэх Үндэсний хөгжлийн газар гэснийг тус тус хүчингүй болгож байгаа юм. Өөрөөр хэлбэл ирэх оны нэгдүгээр сарын 1-нээс Харилцаа холбоо, мэдээллийн технологийн газар болон Үндэсний хөгжлийн газар гэсэн хоёр агентлагийг ерөнхийд нь “татан буулгах” юм. Энэ хоёр агентлагийн эрхлэх асуудлууд нь шинээр байгуулагдах хоёр яаманд харьяалагдана гэсэн үг.

Энэ хоёр агентлаг нь одоо бол Ерөнхий сайдын эрхлэх асуудлын хүрээнд буюу Ерөнхий сайдын харьяа, Засгийн газрын тохируулагч агентлагууд юм. Харилцаа холбоо, мэдээллийн технологийн газрын даргаар Б.Болор-Эрдэнэ ажилладаг бол Үндэсний хөгжлийн газрын даргаар жил хүрэхгүйн өмнө Х.Батжаргалыг томилж байв. Шинээр яам байгуулах яриа гарснаас хойш л Цахим хөгжил, харилцаа холбооны сайдаар ажиллах магадлалтай хүмүүсийн эхэнд Б.Болор-Эрдэнэ нэрлэгдэж байв.

Гэсэн ч яг л зэрэг нэмэхийн өмнө гэдэг шиг Б.Болор-Эрдэнэ дарга өнгөрсөн есдүгээр сард “Дижитал үндэстэн” шоу зохион байгуулснаас хойш коронавирусын халдвар огцом өсч, энэ хэрээрээ олны шүүмжлэлд өртсөн. Рейтинг нь тийм ч өндөр биш байгаа энэ үед Л.Оюун-Эрдэнэ Ерөнхий сайд түүнийг сайдаар томилбол хүлээж авах хөрс лав байхгүй гэсэн үг. Өөрөөр хэлбэл, агентлаг нь татан буугдаж байгаа Б.Болор-Эрдэнийн хувьд сайд болон дэвших магадлал маш бага болж байна.

Мөн л Засгийн газрын бүтэц, бүрэлдэхүүнд орсон өөрчлөлттэйгөөр холбоотой “татан буугдаж” байгаа нөгөө агентлаг болох Үндэсний хөгжлийн газрын даргыг өнгөрсөн арванхоёрдугаар сарын 20-диор томилсон. Тус газрын даргаар Байгаль орчин, аялал жуулчлалын яаманд газрын даргаар ажиллаж байсан Х.Батжаргалыг томилсон билээ.

Түүний хувьд УИХ-ын гишүүн Ж.Мөнхбатын дотнын найз, гишүүн асан Д.Оюунхоролын ойрын хүн гэгддэг юм.

О.Балдан-Очир