Соёлын сайд Ч.Номин гэсэн дардастай, “Гацуурт” компанийн лого бүхий хүнсний ууттай, “Эх орныхоо үржил шимт хөрсөнд тарьж ургуулсан монгол хүний сэтгэл, хөдөлмөр шингэсэн шинэ ургацын хүнсний ногооны дээжээс хүргэж байна” гэсэн бичигтэйгээр УИХ-ын гишүүн Н.Учрал, түүний гэргий Ч.Сэлэнгэ нарт хаягласан төмс, лууван, байцаа, саримсны зураг сошиалд тавигдсан цагаасаа л олны анхааралд оров.

УИХ-ын гишүүн Н.Учралын гэргий, инстаграмын идэвхтэй хэрэглэгч Ч.Сэлэнгэ Соёлын сайд Ч.Номингийн энэхүү бэлгийн зургийг тавьснаар амралтын хоёр өдөр сошиал орчинд чамгүй “хэлэлцүүлэг” өрнүүлээд авав. Энэ талаар Ч.Номин сайдын нөхөр Б.Бат-Эрдэнэ “Шинэ ургацын дээжээсээ айл саахалттайгаа хуваалцдаг эртний сайхан уламжлал бий билээ. Ингэж тараагаад арваад жил болж байна” гэсэн бол “Гацуурт” компанийн шинэ ургацыг Соёлын сайдаас бэлгэнд авсан УИХ-ын гишүүн Н.Учрал “Найз нөхөд бие биедээ хийсэн бүтээснийхээ дээжээс хуваалцах чинь Монгол ёс шүү дээ. Улстөржүүлээд яахав” гэж тус тусын сошиал хуудсаар бичсэн.

Уг нь сошиалд өрнөсөн “хэлэлцүүлэг” нь тариаланч Ч.Номин тарьсан ногоогоо хэн нэгэн найз нөхдөдөө бэлэглэсэн тухай биш байсан бөгөөд харин Соёлын сайд Ч.Номин өөрийн хамаарал бүхий компанийхаа бүтээгдэхүүнээр УИХ-ын гишүүн, урлаг соёлынхны гарыг цайлгасанд л байсан билээ. Бүр тодруулбал, “Гацуурт” компанийн бүтээгдэхүүнийг Чинбатын Номин Монгол Улсын Соёлын сайдын нэрийн өмнөөс гар цайлгаад байж болохгүй л гэж байгаа юм. Дашрамд дурдахад 2019 оны арванхоёрдугаар сарын 09-нд “Гацуурт” компани хүнсний ногоо үйлдвэрлэлийн бизнесээ зогсоож байгаагаа АЛБАН ЁСООР мэдэгдэж МЭДЭГДЭЛ гаргаж байсан юм.

С.Сүлд