УИХ-ын Ёс зүй, сахилга хариуцлагын байнгын хорооны дарга Б.Бат-Эрдэнэ УИХ-ын гишүүдийн ирц, ёс зүйн асуудлаар өнөөдөр мэдээлэл хийв. Тэрбээр “Намрын чуулганы өнгөрсөн сарын ирцийн мэдээллийг танилцуулъя. Энэ хугацаанд УИХ-ын чуулган нийт 10 удаа хуралдлаа.  УИХ-ын 19 гишүүн хуралдаан тасалж, 30 гишүүн хоцорсон бөгөөд 57 гишүүн хуралдааныг таслаагүй. УИХ-ын даргын 45 дугаар захирамжаар УИХ-ын гишүүний ёс зүйн дүрмийн төслийг шинэчлэн боловсруулах ажлын хэсгийг ахалж ажилалаа. Нам бүлгийн төлөөллийг оролцуулж хуулийн төсөл өргөн бариад байна.

Хүний картанд хүрсэн, кнопыг очиж дардаг асуудлаар шаардлага тавьсаар ирсэн. Цаашид үүнийг шаардсаар байна. Төр, ард түмнийг төлөөлж буй УИХ-ын гишүүд ажилдаа хариуцлагатай, ёс зүйтэй байх ёстой юм. УИХ-ын гишүүн нь хуралдаанд оролцохгүй байх, таслахтай холбоотой зохицуулалт сул байсан. УИХ-ын гишүүний шинэ ёс зүйн дүмээр энэ хариуцлагыг тодорхой болгоно. Тус дүрмийн 10.7.3-т хүндэтгэн үзэх шалтгаангүйгээр нэгдсэн байнгын дэд, түр хорооны хуралдааныг гурав ба түүнээс дээш удаа тасалсан, хуралдааны цахим ирцэд бүртгүүлсэн дүнгээр хоцорсон буюу тасалсан цаг нь ажлын гурван өдрийн цагаас дээш гарсан бол УИХ-ын ёс зүй, сахилга хариуцлагын байнгын хорооны хуралдаанаар оруулж хариуцлага тооцно” гэв.

Б.Жаргал