Д.Нацагдоржийн нэрэмжит Улаанбаатар хотын төв номын санд Олон улсын нийтийн номын сангийн үйл ажиллагааны жишигт нийцүүлэн тохижуулсан "Хөтөлбөрийн танхим" нээгдлээ. АНУ-ын элчин сайдын яамны 100 хувийн хөрөнгө оруулалтаар засварлажээ. Улаанбаатар хотын төв номын санд Америкийн соёл мэдээллийн төв 2004 онд байгуулагдсан бөгөөд номын сангийн үйлчилгээнээс гадна цуврал лекц, кино, англи хэлний яриа болон номын клубүүд, төлбөргүй интернэт, утасгүй интернэт үйлчилгээ зэрэг олон нийтэд зориулсан хөтөлбөрүүдийг үнэ төлбөргүйгээр зохион байгуулан явуулдаг аж. Харин олон нийтэд зориулсан арга хэмжээ, хөтөлбөр явуулахдаа уншлагаа зогсоодог байсан тул тусгай өрөө танхимтай болох шаардлага гарсан байна.

Энэхүү тохижуулсан танхимд Америкийн соёл мэдээллийн төвөөс зохион байгуулдаг хөтөлбөрүүд цаашид тогтмол болох юм байна. Тухайлбал, хүүхдэд зориулсан англи, монгол хэл дээрх уншлага, хүүхдүүдийн англи хэлний үгийн санг нэмэгдүүлэх зорилгоор зохион байгуулдаг тоглоомын өдөр зэрэг багтана. Мөн уран зохиол уншлагын цаг, "Америкийн тухай ярилцъя" лекц, кино үдэш зэрэг арга хэмжээнүүд болж байх юм байна. "Хөтөлбөрийн танхим"-ын нээлтэд АНУ-ын Элчин сайд Пайпер Энн Кэмбелл, ССАЖ-ын сайд Ц.Оюунгэрэл болон бусад албаны хүмүүс оролцсон юм.