ШӨХТГ-ыг дарга Б.Бат-Эрдэнэ "Эрдэнэс Тавантолгой" ХК-ийн ТУЗ-ийн даргаар давхар ажилладаг. Уг нь Б.Бат-Эрдэнэ ЗГХЭГ-ын дэд даргаар ажиллаж байсан ч 2018 оны арваннэгдүгээр сард гэнэт чөлөөлөгдсөн. Эх сурвалжууд түүнийг ЖДҮ-гээс болоод чөлөөлөгдлөө гэцгээсэн. Гэвч УИХ-ын 2020 оны сонгуулийн дараа, наймдугаар сарын 19-нд ШӨХТГ-ын даргаар томилогдсон.

Улмаар хоёр сарын дараа “Эрдэнэс Тавантолгой” ХК-ийн ТУЗ-ийн дарга болсон байдаг. Энэ нь Өрсөлдөөний тухай хууль, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль, “Эрдэнэс Тавантолгой” ХК-ийн ТУЗ-ийн үйл ажиллагааны журам зэргийг ноцтой зөрччихсөн.

Нэг хачирхалтай юм бий. 2020 оны аравдугаар сарын 19-нд “Эрдэнэс Тавантолгой” ХК-ийн ТУЗ-ийн ээлжит бус хурал болсон. Түүгээр ШӨХТГ-ын дарга Б.Бат-Эрдэнэтэй хамт “Эрдэнэс Тавантолгой” ХК-ийн ТУЗ-ийн төрийн төлөөллийн гишүүнээр ЗГХЭГ-ын дэд дарга Б.Энх-Амгаланг сонгосон байдаг. Харин одоо Б.Энх-Амгалан "Эрдэнэс Тавантолгой” ХК-ийн ТУЗ-д байхгүй. Гэтэл "Эрдэнэс Тавантолгой” ХК-ийг байгуулсан цагаас ТУЗ-ийг нь үе үеийн ЗГХЭГ-ын дэд дарга хариуцаж ирсэн. Угаасаа “Эрдэнэс Тавантолгой” ХК нь олон нийтийн өмчлөлтэй компани учраас Засгийн газар шууд хариуцдаг.

Гэтэл ШӨХТГ нь Шадар сайдын эрхлэх асуудлын хүрээнд үйл ажиллагаа явуулдаг Засгийн газрын тохируулагч агентлагийн даргыг ингэж дээшлүүлсэн нь анхаарал татаад байгаа юм. Өөрөөр хэлбэл, урьдаас тогтож ирсэн уламжлалаар ЗГХЭГ-ын дэд дарга Б.Энх-Амгалан ТУЗ-д сонгогдсон атал ШӨХТГ-ын даргыг ТУЗ-ийн даргаар томилсон. Тэгээд Б.Энх-Амгалан ТУЗ-өөс гараад явчихсан нь ямар учиртай вэ. Хамгийн гол нь ШӨХТГ-ын дарга Б.Бат-Эрдэнийг "Эрдэнэс Тавантолгой" ХК-ийн ТУЗ-д очсоноос хойш тендерийн хэрүүл тасрахаа болив. Та бүхэн санаж байгаа бол Баяжуулах үйлдвэртэй холбоотой тендер бантан болж магадгүй болоод байна. Ер нь Б.Бат-Эрдэнэ "Эрдэнэс Тавантолгой" ХК-ийн ТУЗ-д хэний эрх ашгийг хамгаалж суудаг вэ. Мань эр өөрөө 2024 онд Эрдэнэтээс нэр дэвшинэ гэж гүйгээд байгаа. Тэгэхэд нь хэрэг болно гэж "Эрдэнэс Тавантолгой" ХК-ийн ТУЗ-ийн даргын ажилтай зууралдаад байна уж. Эсвэл улс төрийн дэмжлэг үзүүлэх хэн нэгэн даргын "хүсэлт"-ээр элдвээр хэлүүлсэн ч гүрийсээр байгаад байна уу?!

Б.Жаргал