Ингэснээр төрийн тэргүүн Төсвийн тухай хуульд хориг тавих эсэхээ арваннэгдүгээр сарын 30 гэхэд шийдэхээр болж байна.

Монгол Улсын 2022 оны Төсвийн тухай хуулийг УИХ арваннэгдүгээр сарын 12-нд баталсан. УИХ-ын чуулганы хуралдааны дэгийн тухай хуульд зааснаар аливаа хууль тогтоолын эцсийн найруулгыг УИХ-д танилцуулснаас хойш УИХ-ын дарга ажлын гурав өдрийн дотор гарын үсэг зурж, ёсчилдог. УИХ-ын даргын ёсчилсон хууль, тогтоолыг Тамгын газар ажлын хоёр өдрийн дотор Монгол Улсын Ерөнхийлөгчийн Тамгын газарт илгээдэг. Ингэж илгээсэн хууль, тогтоолыг Ерөнхийлөгчийн Тамгын газар хүлээн авсан өдрөөс хойш ажлын таван өдөрт багтаан Монгол Улсын Ерөнхийлөгч тухайн хууль, тогтоолыг бүхэлд нь буюу түүний зарим хэсэгт хориг тавих эсэх асуудлыг шийдвэрлэнэ гэж дэгийн тухай хуульд заасан байдаг. УИХ-ын ерөнхий нарийн бичгийн дарга Л.Өлзийсайханаас Монгол Улсын 2022 оны төсвийн тухай хуулийг УИХ-ын дарга ёсчилсон эсэх талаар тодрууллаа.

-Ирэх оны төсвийн тухай хуулийн эцсийн найруулгыг хэзээ УИХ-д сонсгосон бэ?

-Өнөгрсөн баасан гарагт буюу арваннэгдүгээр сарын 19-нд Монгол Улсын 2022 оны төсвийн тухай хуулийн эцсийн найруулгыг УИХ-д сонсгосон байгаа.

-УИХ-ын дарга энэ хуулийг ёсчилсон уу?

-Хуульд зааснаар эцсийн найруулгыг сонсгосноос хойш ажлын гурван өдрийн дотор УИХ-ын дарга ёсчлон, гарын үсэг зурдаг. Энэ хугацаа дуусаагүй байна. Монгол Улсын 2022 оны төсвийн тухай хуулийг маргааш УИХ-ын даргаар ёсчлуулахаар төлөвлөсөн байгаа.

-Ёсчилсон хуулийг хэзээ Ерөнхийлөгчийн Тамгын газарт хүргүүлэхээр төлөвлөсөн бэ?

-Ёсчилж гарын үсэг зурсны дараа, маргааш Ерөнхийлөгчийн Тамгын газар хүргүүлэхээр төлөвлөсөн байгаа. Ёсчилсон хуулийг ажлын хоёр өдөрт багтаан Монгол Улсын Ерөнхийлөгчийн Тамгын газар хүргүүлэх ёстой байдаг.” 

Тодруулж хэлэхэд УИХ-ын Тамгын газар Ерөнхийлөгчийн Тамгын газарт УИХ-ын даргын ёсчилсон хууль, тогтоолыг өргөн барьсан өдрөөс хойш Төрийн тэргүүн тухайн хууль, тогтоолд хориг тавих эсэх хуулийн хугацаа гүйж эхэлнэ. Энэ хугацаа нь дээр дурдсанчлан ажлын тав хоног байдаг юм.

УИХ-ын Тамгын газар төлөвлөсөн ёсоороо маргааш УИХ-ын даргаар ирэх оны төсвийн тухай хуулийг ёсчлуулаад, Ерөнхийлөгчийн Тамгын газарт хүргүүлэх юм бол төрийн тэргүүн ирэх оны Төсвийн тухай хуульд хориг тавих эсэхээ шийдэх хуулийн хугацаа арваннэгдүгээр сарын 30 байх нь ээ.

Учир нь энэ хугацаа ажлын таван өдрөөр тоологддог бөгөөд арваннэгдүгээр сарын 26 албан ёсны амралтын өдөр учир Ерөнхийлөгч хориг тавих эсэхийг шийдэх хуулийн хугацаа нь энэ сарын 30 байх юм.

С.Сүлд