Энэ өдрүүдэд буриадын нийслэлд Орос, Монголын аудиторуудын зөвлөгөөн болж байна. Уг арга хэмжээний нээлт дээр Буриадын тэргүүн Вячеслав Наговицын Сэлэнгэ мөрний усыг Говь руу татах болон усан цахилгаан станц барих төслийн талаар санаа зовж буйгаа илэрхийлэн дараах үгийг хэлжээ.

-Сэлэнгэ мөрөн бол улс дамнасан гол. Гол маань ямар байх нь Орос, Монгол хоёр улсын хамтын ажиллагаанаас шалтгаална гэж тэр яриагаа эхэлсэн байна.

Буриадын талын санаа зовж буй асуудал бол Сэлэнгэ мөрний цутгал Орхон голын усыг суваг татан говь руу урсгах төсөл юм. Ингэсэнээр Байгаль нуурын гол эх болсон Сэлэнгэ мөрний төвшин гуравны нэгээр багасна гэж Оросын эрдэмтэд анхааруулан шүүмжилж байгаа билээ. Мөн Сэлэнгэ мөрөн дээр барих “Шүрэн” хэмээх усан цахилгаан станц загасны нүүдлийг хязгаарласнаар Байгаль нуурын загасны тоо толгойд сөргөөр нөлөөлнө гэж тэд үзэж байгаа юм.

-Монголын нутаг дэвсгэр дээр 20 ширхэг усан сан байгуулах, усан цахилгаан станц барих, газар тариаланг усжуулах гэж урсгалыг нь өөрчлөх зэрэг яриа сэтгэл зовоож байгааг нуухын аргагүй байна. Тэгсэн атлаа энэ яриа хөөрөөг Монголын тал Оростой нэг ч удаа хэлэлцээгүй юм гэж Вячеслав Наговицын монголчуудад хандан хэлжээ.

-Мэдээж хэрэг, манай эрдэмтэд үүнд үнэхээр сэтгэл зовж байгаа. Мэрэжлийн төвшинд асуудлыг судалдаг эрдэмтдийн хүрээнд хамтарч хэлэлцэх хүсэлтэй байгаагаа илэрхийлье. Байгаль бол дэлхий дахины өв баялаг учраас асуудлыг бултаараа ярилцлвал буруугүй байх болно. Өнөөдөр томоохон байгууламж барьж эхлээ ч үгүй байхад Сэлэнгэ мөрнийг Монголын талаас тогтмол бохирдуулах, тэр тусмаа аюултай бодис хаях явдал ажиглагдаж байна. Буриадад голын уснаас авсан шинжилгээнд мөнгөн ус байнга илрэх боллоо. Сэлэнгэ мөрнийг усыг их хэмжээгээр ашигладаг алт олборлох уурхайнуудын чанаргүй үйл ажиллагаанаас манайх руу мөнгөн ус орж ирж байгааг бид ойлгож байна гэж Буриадын төрийн тэргүүн анхааруулжээ.