Батлан хамгаалахын сайд, ЗХЖШ-ын даргын тушаалаар Зэвсэгт хүчний офицер, ахлагчийн түвшин тогтоох үзлэг болж байна. Өнгөрсөн тавдугаар сараас эхэлсэн энэхүү түвшин тогтоох үзлэгт одоогоор Зэвсэгт хүчний нэгтгэл, ангиуд, төрлийн цэргийн командлалууд болон Батлан хамгаалах яамны харьяа 10 гаруй байгууллагын бүрэлдэхүүн бүрэн хамрагджээ. ЗХЖШ-ын нэгдүгээр орлогч дарга, хурандаа С.Ганбямбаар ахлуулсан комиссын бүрэлдэхүүн өнөөдөр Зэвсэгт хүчний Хуурай замын цэргийн командлалд ажиллаж, офицер, ахлагч бүрийн биеийн тамирын бэлтгэлжилт, ажлын гүйцэтгэл, үр дүн, албаны хандлага, мэргэжлийн түвшин, сахилга, ёс зүйн төлөвшил, эрүүл мэндийн болон сэтгэл зүйн байдлыг тогтоохоор таван чиглэлийн шалгалт авсан байна. Түвшин тогтоох үзлэг Батлан хамгаалах салбар, Зэвсэгт хүчний хэмжээнд 99 хувьтай явагдаж байгаа ба маргааш буюу ирэх сарын 01-ний өдөр Зэвсэгт хүчний Жанжин штабын бүрэлдэхүүн бүрэн хамрагдана. Харин БХЯ-ны хувьд комиссын бүрэлдэхүүнээ сонгож, үзлэгийг дотооддоо явуулснаар энэхүү арга хэмжээ дуусгавар болж байгаа юм. Нэгдсэн дүгнэлтийг арванхоёрдугаар сардаа багтаан гаргах ажээ.