Яг баттай хэлсэн гэдгийг нь мэдэхгүй юм. Ямар боловч Испанийн эзэн хааны баг “Реал Мадрид”-ын дасгалжуулагч асан Висенте Дель Боске мөнхийн өрсөлдөгч Каталоны “Барселона” клубын талаар “Намайг “Реал”-ыг дасгалжуулж байхад “Барса”-гийнхан ойн баяраа л тэмдэглэдэг байлаа” гэсэн гэдэг. Түрүүлж болох бүх цомыг нь өрсөлдөгч “Реал Мадрид”-ынхан өргөчихсөн учраас “Барселона”-д ердөө клубын ойгоо тэмдэглэх л үлдсэн гэж ёжилж байгаа хэрэг л дээ. Энэ хоёр баг бол зөвхөн хөлбөмбөгийн спорт төдийгүй тусгаар тогтнол, салан тусгаарлах үзлийн илэрхийлэл болдог учраас үргэлж хоорондоо амжилтаараа өрсөлдсөөр ирсэн. Хоорондын тоглолтыг нь ч дэлхий нийтээрээ “Эл Класико” хэмээж хүлээж үздэг уламжлалтай. 

Тэгвэл Монголын улс төрийн хоёр том “клуб” МАН, АН-ын нөхцөл байдал Висенте Дель Боскегийн үеийн Испанийн Лалигийг санагдуулам. Засгийн эрхийг ээлжилж, эсвэл эвсэж барьсаар ирсэн энэ хоёр намын өнөөгийн нөхцөл байдлаас харахад “Реал” нь МАН юмдагуудаа. УИХ-ын сүүлийн хоёр сонгуульд үнэмлэхүй ялалт байгуулж, нийслэл, орон нутагт ч засаглаж байгаа МАН-ынхан Ерөнхийлөгчийн сонгуульд ч үнэмлэхүй ялалт байгууллаа. 

Хөлбөмбөгөөр бол лигтээ, Аваргуудын лигт гээд авч болох бүх цомыг тэд өргөөд байна. Харин АН-д үнэндээ юу ч үлдсэнгүй. Дотоод улс төрөө дааж чадахгүй байгаа энэ намд ардчиллын төлөөх намууд нэгдсэн арванхоёрдугаар сарын 6-ны ойн өдөр нь ч үлдсэнгүй. 

Эрх баригч МАН-ынхан энэ өдрийг нь товлож байж намын 30-р Их хурлаа өнөөдөр хийж байна. Доромжлол гэлтэй. Тэгэхээр АН-д өнгөрсөн түүх нь л үлдсэн болохоос өнөөдрийн ялалтын баяр, үгүй ядахнаа таван нам нэгдэж АН байгуулгагдсан ой нь ч үлдсэнгүй. Бүгд МАН-д очлоо. 

О.Балдан-Очир