МАН-ын Их хурал болж байна. Энэ үеэр МАН-ын ерөнхий нарийн бичгийн дарга Д.Амарбаясгалан хурлын төлөөлөгчдөд хандаж үг хэлсэн юм. Тэрбээр “Миний бие өмнөх Их хурлаас байгуулагдсан Бага хурлын анхдугаар хуралдаанаас Ерөнхий нарийн бичгийн даргаар дахин сонгогдож, Намаас дэвшүүлсэн хөтөлбөр, намын хөгжил шинэчлэлийг үргэлжлүүлэн хийхийн төлөө журмын нөхөд, мянга мянган дэмжигчдийнхээ итгэлийг алдахгүй нь тулд хичээж, зүтгэж ажиллаа.
Энэ дөрвөн жил улс төрийн үйл явц арвин, намын дотоодод өөрчлөлт шинэчлэлт оргилсон, өмнөө тавьсан зорилгоо бүрэн биелүүлсэн цаг хугацаа байлаа. Өмнөх ээлжит их хурлаас өгсөн үүрэг даалгаварыг амжилттай сайн биелүүлсэний сацуу цаг үеийн хэрэгцээ шаардлагад нийцсэн олон төрлийн ажлыг хамт хүчээр хийж гүйцэтгэсэнийг онцлон тэмдэглэж хэлье. Улс төрийн ууган хүчин МАН байгуулагдсаны түүхт 100 жилийн ойг цаг үеийн нөхцөл байдлын улмаас олон нийтийн мэдээллийн хэрэгсэл, цахим сүлжээгээр нийт ард түмэндээ хүртээмжтэй хэлбэрээр ёсчилон тэмдэглэлээ.
100 жилийн турш эх орныхоо хөгжил дэвшлийн түүчээ, тусгаар тогтнолын бага болж ирсэн МАН-ын түүхийн үнэ цэнэ цаашид ч бүдгэрэх учиргүй. Монголын ард түмэн, гишүүд дэмжигчдийнхээ түүхт 100 жилийн ойн баярын мэндийг дахин дэвшүүлье.
2020 оны УИХ-ын болон Орон нутгийн сонгууль, 2021 оны Ерөнхийлөгчийн сонгууль, олон нийтийн санаа бодол, эрэлт хэрэгцээг судлан гаргаж, улс орны хөгжлийн бодлогыг тодорхойлсон мөрийн хөтөлбөрийг эрдэмтэн судлаачдын оролцоотойгоор боловсруулан сонгуулийн компанит ажлыг стератегийг оновчтой гаргаж, үүний үр дүнд МАН 2020 оны УИХ-ын сонгуулиар хоёр дахь удаагаа парламетийн суудлын 80-аас дээш буюу 62 суудал, НИТ-ийн хурлын сонгуулиар хоёр дараалан 25-аас дээш суудал, орон нутагт 13 аймагт, нийслэлийн найман дүүрэгт олонхи болж, 2021 оны Ерөнхийлөгчийн сонгууль болон УИХ-ын 18, 28 дугаар тойргийн нөхөн сонгуульд дараалан ялалт байгууллаа.
2021 оны Ерөнхийлөгчийн сонгуульд өмнөх долоон удаагийн Ерөнхийлөгчийн сонгуульд аль ч нэр дэвшигч авч байгаагүй өндөр хувь болох 67.7 хувь буюу 840 гаруй мянган сонгогчийн саналыг авсан билээ. Энэ нь МАН аливаа шатны сонгуульд олон нийтийн хүлээлтэд нийцсэн нэр дэвшигчдийг социологийн болон бусад судалгаа, намын ёс зүй, хариуцлагын зарчмыг баримтлан нэр дэвшүүлж байсны үр дүн юм. МАН-д итгэл хүлээлгэж, шат шатны сонгуульд дэмжиж саналаа өгсөн иргэд, сонгогчиддоо чин сэтгэлийн талархал илэрхийлье. Улс төрийн намд дээш гарахад тулгуур хэрэгтэй. Дээр гарсан хойно тэнцвэр хэрэгтэй гэсэн Английн гүн ухаантан хэлсэн байдаг. Ард иргэддээ дахин талархал дэвшүүлье. Бид сонгогчдынхоо итгэлийг үүрэг хариуцлага хэмээн үзэж, амласан мөрийн хөтөлбөрөө амжилттай хэрэгжүүлэхээр зүтгэж байна.
Сонгуульд дараалан ялалт байгуулсан улс төрийн хүчний хувьд бид улс орноо хөгжүүлэх үйлсийг эрхэм болгож, өнөө болон ирээдүй хойч үеийнхээ сайн сайхан амьдралын төлөө нэгэн үзүүрт сэтгэлээр ажиллах болно. МАН үүсэн байгуулагдсаны 100 жил, Ардын хувьсгалын түүхэн 100 жилийн ойн хүрээнд МАН, МАХН нэгдэх үйл явцыг зохион байгуулж, хоёр нам нэгдсэн нь Монгол Улсын том эрх ашигт нийцсэн, улс орныхоо өмнө тулгамдсан олон том зорилтыг хамтран шийдэх чухал ач холбогдолтой нийгмийн хүлээлтэд бодитой хариулт өгсөн түүхэн үйл явдал болсон. Энэ дашрамд нэгдэн нийлсэн намын гишүүд маань үүх түүх, үнэт зүйлээ эрхэмлэн дээдэлж, дотоод эв нэгдлээ ханган эх үйлсийн төлөө хамтдаа зүтгэх ёстой гэдгийг онцлон хэлье” хэмээсэн юм.
Б.Жаргал
