Иргэн М.Батболд бага оврын сэргээгдэх эрчим хүчийг ашиглан цахилгаан дулааны эрчим хүч үйлдвэрлэх технологийг айл өрхийн хэрэглээнд нэвтрүүлэх төслийг хэрэгжүүлжээ. Эрчим хүчний сайд Н.Тавинбэх дээрх загвар төсөлтэй танилцлаа. Тэрбээр “Айл өрхүүд хэрэглээндээ нарны эрчим хүчийг ашигласнаар эрчим хүчний дутагдалд орохгүй байх боломжтой” гэлээ.

Сонгинохайрхан дүүргийн 34 дүгээр хорооны иргэн М.Батболд: Эрчим хүчний үүсгэвэртэй болохын тулд эхлээд байшингийн зургаа үүсгэвэртэйгээ тооцож хийх хэрэгтэй

- Бага оврын сэргээгдэх эрчим хүчийг айл өрхүүд болон албан байгууллагад ашиглах боломжтой. Өрхийн хэрэглээнд сэргээгдэх эрчим хүчийг ашигласнаар цахилгаан дулаанаа өөрсдөө үйлдвэрлэж, улсад мөнгө төлөх биш харин орлого олох боломжтой. Нарны эрчим хүч ашигласнаар дан цахилгаан эрчим хүчний ашиглалтыг 3-4 дахин хэмнэнэ. Айлууд эрчим хүчний үүсгэвэртэй болохын тулд эхлээд байшингийн зургаа үүсгэвэртэйгээ тооцож хийх хэрэгтэй. Хэрэв үгүй бол байшингийн дээврийн даац хэтэрч, нарны коллектор тавих зай талбай хүрэлцэхгүй асуудал үүсдэг. Харин аль хэдийн баригдсан байшинд хийхийн тулд ахин дээврийн даацыг тооцоолж шинээр хийх хэрэгтэй болдог. Мөн байшин дулаан алдагдал маш бага байх нь чухал, хэрвээ байшин дулаанаа их алддаг бол хэчнээн сэргээгдэх эрчим хүч ашиглаад ч хэрэггүй болдог. Тиймээс байшингаа дулаан алдагдалгүй барих хэрэгтэй.

Эрчим хүчний сайд Н.Тавинбэх: Хөрсний бохирдол, агаарын бохирдлыг бууруулах боломжтой

- Дэлхийн дулаарал, хүлэмжийн хийн ялгаралыг бууруулах зорилгоор дэлхий нийтээрээ сэргээгдэх эрчим хүчний үүсвэр ашиглахад чиглэж байна. Сэргээгдэх эрчим хүчийг өрхийн хэрэглээнд нэвтрүүлэх хуулийн зохицуулалт гараад аль хэдийн хоёр жил өнгөрсөн. Гэвч одоогоор хэрэгжүүлсэн айл өрх төдийлөн байхгүй энэ талаар иргэдэд мэдээлэл дутмаг байна. Хэрэв айл өрхүүд хэрэглээндээ сэргээгдэх эрчим хүчийг ашиглаж эхэлвэл чадлын дутагдалаас гарах, хөрсний бохирдол, агаарын бохирдлыг бууруулах боломжтой. Мөн иргэдэд орлого олох боломжийг бүрдүүлнэ. Харин өрхийн хэрэглээнд бага оврын эх үүсвэртэй болох эрчим хүчний санхүүжилтийг хэрэглэгч өөрөө өөртөө ачаалалгүй шийдэх, эсвэл эрчим хүчний борлуулалтаасаа төлөх боломжтой байх талаас нь шийдвэрлэх шаардлагатай. Иргэдэд дэмжлэг болох үүднээс худалдах, худалдан авах үнийг тогтоох, иргэдийн санхүүжилтийг төрөөс дэмжих ёстой. Тиймээс ямар арга хэмжээ авч ажиллах талаар тодорхой болгоно.

Өөрөөр хэлбэл айл өрхүүд хэрэглээндээ сэргээгдэх эрчим хүчийг ашигласнаар өөрийн хэрэглээг 100 хувь хангаж илүүдэл эрчим хүчээ улсад зарж орлого олох боломжтой. Ингэснээр чадлын дутагдалыг нөхнө. Харин дулааны алдагдалгүй байшин бариснаар эрчим хүчийг бага зарцуулна.

Т. Мөнхжаргал