УИХ дахь АН-ын бүлгийн хуралдаанаас гарсан шийдвэрийг УИХ-ын гишүүн, Бүлгийн дарга Д.Ганбат тайлбарлалаа. Тэрбээр “Монгол Улсын 171,349 иргэн гадны 87 улсад ажиллаж амьдардаг байна. Үүнээс 30, 40 мянган иргэн хууль бусаар ажиллаж амьдардаг гэсэн мэдээлэл байна. БНСУ-д байгаа Элчин сайдын яам 15 ажилтантай. Дундаж цалин нь 1900-2000 ам.доллар юм байна. Тус улсад 13 настай монгол охин хүчирхийлэлд өртсөн. Элчин сайдын яам иргэдийнхээ эрх ашгийг хангаж, хамгаалж ажиллах ёстой. Энэ тал дээрээ анхаарч ажиллахыг анхаарууллаа. Хохирогчийн ээж “Бид Элчин сайдын яамандаа итгэхгүй байна” гэж хэлж байсан. Өнөөдөр эрх барьж буй МАН Азид байгуулагдсан анхны нам гэж өөрсдийгөө нэрлэдэг. Мөн улс төрийн ууган хүчин, сая 100 жилийн ойгоо хийсэн. Гэтэл 100 жил болсон намтай улсын ард иргэд нь гадаадад хүнд нөхцөлд ажиллаж байгаа нь шившиг. Үүнээс гадна Энэтхэг улсад манай 600 гаруй хүүхэд шашны сургуульд сурдаг. Энэ тал дээрээ анхаараач гэдгийг хэллээ” хэмээв.

Б.Жаргал