Арванхоёрдугаар 13. Энэ өдөр монголчуудын хувьд түүхэн шийдвэр гаргасан өдөр болж үлдэж байна. Жилийн өмнөх энэ өдөр 30, 31 дэх Ерөнхий сайд У.Хүрэлсүх айл бүрийн цахилгааны төлбөр, айл өрх бүрийн дулааны төлбөр, усны төлбөр, хогны төлбөр, дулааны төлбөрийг тэглэж, сайжруулсан шахмал түлшний үнийг 75 хувь болгож хямдруулах шийдвэр гаргаж байв. Цар тахлыг монголчууд хүндрэл багатай даван туулахад экс Ерөнхий сайдын энэхүү шийдвэр чухал нөлөө үзүүлсэн.

Тэгвэл жилийн дараах энэ өдөр буюу өчигдөр 32 дахь Ерөнхий сайд Л.Оюун-Эрдэнэ “Рио Тинто” группын удирдлагуудтай хэлэлцээр хийсний дүнд буулт хийлгүүлж, “Оюу Толгой” төслийн Монгол Улсын Засгийн газрын эзэмшлийн 34 хувьд ногдох 2.3 тэрбум ам.долларын өрийг 100 хувь тэглүүлэх болсноо дуулгав. Мөн “Оюу Толгой”-н далд уурхайн бүтээн байгуулалт, санхүүжилтийн нэмэлт төлөвлөгөөг цуцлаж дуусгавар болгох,  “Оюу Толгой”-н далд уурхайн бүтээн байгуулалтын төслийн санхүүжилтэд хөндлөнгийн аудит оруулахыг зөвшөөрөх, Гүний уурхай ашиглалтад орж олборлолт эхлэх хугацаа буюу 2023 оны эхний хагас хүртэлх нэмэлт зардлыг хөрөнгө оруулагч тал 100 хувь хариуцаж Эрдэнэс Оюу Толгой ХХК-д нэмэлт өр үүсгэхгүй байх, Оюу Толгой ХХК-ийн засаглалыг сайжруулах байдлаар гүний уурхайн төслийн хяналтыг сайжруулах арга хэмжээ авч холбогдох зардлыг харилцан тохиролцсон нөхцлийн дагуу Оюу Толгой ХХК төлөх Монгол Улсын эрчим хүчний нэгдсэн сүлжээнээс Цахилгаан эрчим хүчээр хангах гэрээ байгуулах, төслийн байгаль орчин, нийгэм, засаглалыг сайжруулах чиглэлээр хамтран ажиллах гэсэн саналыг гаргуулж чадсан юм. Энэ баярт мэдээ монголчуудад өр өгөөжөө өгөх нь лавтай.

Б.Жаргал