УИХ-ын чуулганы нэгдсэн хуралдаан эхэллээ. Хуралдааны эхэнд УИХ-ын гишүүн Б.Пүрэвдорж Нийгмийн даатгалын сангаас тэтгэвэр, тэтгэмжийн тухай хуульд өөрчлөлт оруулах тухай хулийг дагаж мөрдөх журмын тухай хуулийн төслийг хэлэлцэх асуудлын дараалалд оруулах талаар үг хэлэв. Тэрбээр “Ахмадуудын 60, 70 хувь нь 300-400 мянган төгрөгийн тэтгэвэр авч амьдарч байна. Цар тахал, үнийн өсөлтийн үед маш хүнд нөхцөлтэй байна. Шударгаар 30, 40 жил нийгмийн даатгал өндөр хувиар төлчихөөд бага тэтгэвэр авч байна. Долоон жилийн дунджийг таван жилийн дунджаар тэтгэвэр олгох тухай, 2018 оноос хойш долоон жилээр бодогдсон хүмүүсийг буцааж таван жилээр бодуулах тухай хуулийн төслийг өргөн барьсан.

Энэ талаар өнгөрсөн долоо хоногт хэлэлцүүлэх хүсэлт гаргасан боловч харамсалтай нь даргын зөвлөл хэлэлцсэнгүй. Энэ хуулийг батлах юм бол ахмадууд сард дунджаар 120 мянган төгрөгийн тэтгэвэр нэмж авах юм. Иймээс энэ хуулийг хэлэлцэх зайлшгүй шаардлагатай байна. Хөшөө барихад мөнгө зардаг мөртлөө ахмадуудаасаа мөнгө харамладаг төр байж болохгүй. Энэ хуулийг хэлэлцэхгүй учраас би ахмадуудтайгаа хамтарч тэмцэхээр болсон.

Тэтгэвэрийг долоон жилийн дунджаар биш, таван жилийн дунджаар тогтоолоцгооё гэдэг фэйсбүүк групп нээсэн. УИХ-ын дарга сонгогдсон Баянхонгор, Ерөнхий сайд сонгогдсон Хэнтий, Дэд дарга сонгогдсон Чингэлтэй дүүргийн үүд, талбай дээр 50 хүн энэ шаардлагыг бариад зогсооч ээ” гэв.

Б.Жаргал