Замын-Үүдийн ачаа тээврийг "Үндэсний тээврийн корпораци" хэмээх  ложистикийн 13 компани монопольдож байгаа тухай мэдээлэл сүүлийн өдрүүдэд нийгмийн сүлжээгээр тархсан. Тодруулбал, “Монгол-Экспресс”, “Ландбридж”, “Ти Ай Ложистик”, “Илинкс-Экспресс” зэрэг 13 компани нийлээд “Үндэсний тээврийн корпораци” байгуулсан. Тус корпорацийн хувьцаа эзэмшигч дунд И.Шатархүүгийн эзэмшдэг “Илинкс-Экспресс” компани байгаа юм. Хамгийн сонирхолтой нь тээвэр ложистикийн монополь тогтоосон гэгдэж байгаа "Үндэсний тээврийн корпораци"-ийг бүрдүүлж байгаа "Илинкс-Экспресс" компани нь Зам тээврийн хөгжлийн сайд Л.Халтартай эрх ашгийн хамааралтай байж магадгүй байгаа юм. Учир нь энэ компанийн эзэмшигч И.Шатархүү нь "Монгол чихэр корпораци" ХХК-ийг мөн эзэмшдэг.

Тэгвэл Л.Халтар сайд өөрийн хөрөнгө орлогын мэдүүлэгтээ мөн л энэ компанийн хувь эзэмшигч гэдгээ мэдүүлсэн байдаг.

Бүр хачирхалтай нь Л.Халтар сайдын хувь эзэмшдэг гэгдээд байгаа энэхүү Монгол чихэр корпораци ХХК нь өчигдөр татан буугджээ. Өөрөөр хэлбэл "Үндэсний тээврийн корпораци" Л.Халтар сайдтай эрх ашгийн хамааралтай гэсэн мэдээлэл гарсны дараа татан буугдсан гэсэн үг юм.

Тодруулахад "Үндэсний тээврийн корпораци" Замын-Үүдийн боомтоор битүү чингэлэгтэй ачаа гарах, гаргахдаа ачаа бүрээс 220 мянган төгрөг авч буй гэсэн мэдээлэл байгаа юм.

Д.Батчулуун