УИХ-ын бүтцийн нэгж болох байнгын хороод нь сар бүр хэлэлцэх асуудлынхаа цаглабарыг хэлэлцэн баталдаг. Энэ 7 хоногт БОХХААБХ цаглавбараа хэлэлцэх үеэр тс хорооны гишүүн Н.Ганибал идэш бэлтгэх цагаар мал тооллого хийж байгааг шүүмжиллээ. Тэрээр "Дэлхийн дулааралтай холбоотой мал мах бэлтгэх, идшээ бэлтгэх цаг хугацаа нь 12 сарын дунд үе хүргэдэг болчихлоо. Гэтэл энэ цаг хугацаатай давхцуулаад Засгийн газар мал тоолно гээд захиргааны арга хэмжээ аваад, 14 хоногоор хориод, малчид болон хот суурин газрынхан хүнсээ бэлтгэх боломжийг нь хаачихлаа. Дэлхийн дулаарал төдийлөн мэдрэгдээгүй байхад 11 сард идшээ бэлтгэдэг байсан бол одоо 12 сард идшээ бэлтгэдэг болчихсон. Энэ үед мал тоолох нь буруу болчихлоо. Он гараад мал эцэж турна, идэш ууш бэлтгэхэд хоцорсон байна. Тиймээс малын тооллогоо он гаргаад нэг сард хийх хэрэгтэй.  Засгийн газар үүнийг биднээр хэлүүлэхгүйгээр мэдрээд хийчихмээр байгаа юм. Заавал малчид УИХ-ын гишүүд рүү мэссэж бичиж, түүнийг нь бид Засгийн газарт дамжуулж байж ойлгож байна.

Хоёрдугаарт, мал амьтны эрүүл мэндийн тухай хуулийн хэрэгжилтийг хянахаар бид яаралтайгаар Ажлын хэсэг байгуулаад ажиллаж байгаа. Маргаашийн асуудлыг өнөөдөр нь шийдэж байж, үйлдэл нь хийгдэх ёстой. Мал аж ахуйн асуудал гэхэд хэзээ нь вакцинаа хийх вэ, бүрэн хамруулж чадах уу, үгүй юу, өвчин сэдрэхээс өмнө вакцинаа хийж амжих уу гэх мэт асуудлуудыг малчдад тодорхой хэлж өгөх гэж энэ ажлын хэсэг байгуулагдсан. Харамсалтай нь өнөөдөр үүргээ цаг хугацаанд нь гүйцэтгэж чадахгүй байна. Үүнийг ажлын хэсгийн даргад хэлж өгөөч ээ, байнгын хорооны дарга аа" гэв.