МАН-ын Бүлэг хуралдаж гурван асуудлыг хэлэлцжээ. Бүлгээс гарсан шийдвэрийг МАН-ын Бүлгийн дарга Тогтохсүрэн танилцууллаа. Тэрбээр “Нэгдүгээрт Эдийн засгийн Шинэ сэргэлтийн бодлого, түүний дагалдах хуулиудтай холбоотой асуудлыг хэлэлцлээ. Хоёрдугаарт, Ковидын тухай хуулийг сунгах тухай, гуравдугаарт, Төрийн үйлчилгээний албан хаагчдыг гэрээгээр ажиллуулахтай холбоотойгоор шийдвэр гаргасан. МАН-ын 30 дугаар хурлаас гарсан Шинэ сэргэлтийн бодлогыг төрийн бодлого ёстой гэж үзэж, өнөөдөр Ерөнхий сайдаас оруулж ирсэн. Эдийн засгийг сэргээх дунд хугацааны хөтөлбөр, түүнийг дагасан 20 орчим хуулинд нэмэлт өөрчлөлт оруулахтай холбоотой төслийг хэлэлцэж, зарчмын хувьд дэмжлээ. Энэ асуудал лхагва гаригт Засгийн газраас орох юм. Яваандаа 47 хуулийг энэ хүрээнд шийдэх юм.

Мөн Ковидын тухай хууль байна. Өмнө нь хоёр удаа сунгагдсан. Энэ хуулийг зургаан сараар сунгах нь зүйтэй гэж МАН бүлэг үзлээ. Коронавирусний шинэ хувилбар гарч зарим газар аюултай төвшинд хүрч болзошгүй байна. Нөгөөтэйгүүр манай экспорт хаагдсан байгаа. Хил гааль хаагдсан учраас эдийн засагт хүндрэл учирч болзошгүй байгаа. Эцэст нь төрийн үйлчилгээний албан хаагчдыг гэрээгээр ажиллуулахтай холбоотойгоор УИХ шийдэл гаргасан. Үүнийг аймаг, суманд ажиллаж байгаа төрийн үйлчилгээний албан хаагчид эсэргүйцэж байна. Мөн ҮЭ-ийн байгууллага эсэргүйцэж байна. 2021 онд авч байгаа цалин хөлсний нэмэгдэл урамшууллыг ирэх онд бууруулахгүй төвшинд Засгийн газар шийдвэрлэх хэрэгтэй байна. Бага цалин орлоготой хүмүүст хүндрэл учирч болзошгүй. Засгийн газар лхагва гаригийн хуралдаанаараа энэ талаар хэлэлцэж, орон нутгуудад тодорхой хэмжээний чиглэл өгөхөөр болж байна.

Б.Жаргал