УИХ-ын Чуулганы нэгдсэн хуралдаан болж байна. Чуулганаар Цар тахлын хуулийн үйлчлэх хугацааг 2022 оны зургаадугаар сарын 30-ны өдөр хүртэл сунгах эсэхийг хэлэлцэж байна. Энэ үеэр УИХ-ын гишүүн С.Одонтуяа үг хэлж, асуулт асуулаа. Тэрбэр “Хуулийг дураараа өөрчилдөг, хэрэгжүүлдэггүй байдал газар авах шинжтэй болчихлоо. Үндсэн хуулийн цэц дээр ч асуудал үүсэж байна. Ард түмнийг төлөөлж, төрийн эрх барьж байгаа хүмүүс хуулийг хэрэгжүүлнэ гээд орж ирчихээд дураараа аашилж байна. Болохгүй шүү дээ. МАН-ын бүлэгт хангалттай эрх мэдэл байна. Гэтэл яагаад УИХ-ын онцгой эрхэд хандаад байна вэ. Дөрвөн жилийнхээ хоёр жилийг нь Засгийн газартаа өгчихөөр ер нь энэ УИХ тарчихвал яасан юм. Бидэнд хийх зүйл байгаа юм уу. Бидний төсөв хянах эрх алга. Бүх зүйлийг ковид гээд далимдуулна. Ковидын хуулиар явах гэж байгаа бол 2022 оныхоо төсвийн тухай хуульд өөрчлөлт оруулах ёстой. Төсвийн ерөнхийлөн захирагчидаа бүгдийг өөрчил. 2020 оны 11, 12 дугаар сард цар тахал гээд байдал хүнд байхад ковидын хууль хэдэн сар хэрэгжих нь зөв. Энэ бол онцгой үе байсан. Харин одоо шагнал урамшуулалаа олгож, шинэ жилээ хийгээд энгийн үетэй адилхан байж УИХ-ын онцгой эрхэд яагаад халдаад байгаа юм. Ковидын хуулийг болих хэрэгтэй. Улс орныг дампууруулахаа боль л доо. Хичнээн удаа сунгадаг юм. Хуулиа сунгаад нас баралт чинь буурахгүй байна шүү дээ. Ард түмний амьдарал хэцүү байна. УИХ нь ажлаа хийж чадахгүй бол тарая” хэмээн хэлэв.

Б.Жаргал