Ардчилсан намын дарга М.Тулгат УДШ-ийн бүртгэлтэй холбоотой асуудлаар мэдээлэл хийлээ. Тэрбээр “Намын эвлэрэх, нэгтгэх үйл явцыг зарим хүн урвасан, луйварчдад өгч байгаа мэтээр тайлбарлана гэдэг бол байж болохгүй зүйл. Манай намд үзэл санааны тодорхой ялгарал явагдаж байгаа хэдий ч бид баруун төвийн чиг шугам дээрээ бат зогсож байгаа. Нөгөө талд байгаа, ойлголцлолын зөрүүтэй байгаа бодлогын зөрүүтэй гишүүдээ нэг тугийн дор, нэг үзэл санааны дор нэгтгэх бодолтой явж ирсэн. Ардчилсан намын бүртгэл дээр тээг болж байгаа зүйл бол хоёр талаасаа материал өгч байгаа асуудал юм.

Энэ мухардлаас гарахын тулд улс төрийн захиалгаар битгий ажлаач гэдэг хүсэл өгсөн. Зөвхөн О.Цогтгэрэлийн материал байна гэдэг бол намыг О.Цогтгэрэл дээр бүртгэх магадлал өндөр байлаа. Гадаад болон дотоод нөхцөл байдал ардчиллын хувьд эргэлзээтэй, эрсдэлтэй байдал байна. Хөрш орон руу хийж байгаа айлчлалууд. Түүний үр дүн нь. Томоохон гүрнээс ирж байгаа тодорхой дарамт шахалтууд, ардчиллын лидерүүдийг нэг хоёроор нь барьж хорьж байгаа байдал. Өнөөдөр ардчилалд аюул учирч байгаа нөхцөл байдалд Ардчилсан нам хуваагдмал байж болохгүй.

Ардчилсан нам хуваагдмал байх нь эрх баригчдад ашигтай. Хамгийн гол нь шударга шүүх, хуулиа дагасан, улстөрийн дарамт шахалтгүй байдлаар шийдвэрлэж өгнө гэдэг итгэж байна. Улсын дээд шүүхэд бүртгүүлэх үйл явцад ямар нэгэн байдлаар саад болж байгаа хүмүүсийг зарлаж болохгүй байна. Хувь хүнийхээ эрх ашгийг хойш нь тавиач. Ардчиллынхаа хувь заяанд санаа зовниж, 200 мянган гишүүн сэтгэлээ чилээж байна. Энэ аль нэг хүний компани биш. Ардчилсан нам анхныхаа барь суурь, зарчим, цэнхэр өнгөнөөсөө холдоод байна гэж би намын даргын сунгаанд явсан. Би намын дарга байхаасаа илүү Ардчилсан намыг шинэчлэх, Ардчилсан намыг ард түмний хайртай буурин дээрээ буусан нам байлгахын төлөө жолоодох юмсан гээд сайн муугаараа хэлүүлээд явж байна” гэв.

Б.Жаргал