Монгол Улсын Ерөнхийлөгч У.Хүрэлсүх төрийн ордны их хуралдай танхимд үргэлжилж буй хүндэтгэлийн хуралд үг хэллээ. Тэрээр “Бидний өвөг дээдэс, өмнөх үеэс өвлөгдөн ирсэн тусгаар тогтнол бүрэн эрхт байдал, бүтээн байгуулалтыг ирж буй 100 жилд улам бататгах шаардлагатай. Иймээс төрийн тэргүүний дэвшүүлсэн “100 жил, 10 зорилт” хөгжлийн санаачилгыг хэрэгжүүлэхэд  онцгой анхаарч ажиллах нь зүйтэй. Ингэснээр Монгол Улс хүчирхэг эдийн засагтай хөгжингүй улс болно гэж үзэж байна. Ялангуяа эдийн засгийн дархлаагаа дэмжиж, эдийн засгийн эмзэг байдлаа бууруулах хариуцлагатай он жилүүд биднийг хүлээж байна”.

Үүнд:

1.Эх орноо эрчим хүчний найдвартай эх үүсвэрээр хангаж цаашлаад Эрчим хүч экспортлогч улс болох,

2.Газрын тосны бүтээгдэхүүн, түлш шатахуун эх орондоо үйлдвэрлэж, нефтийн аж үйлдвэрийг хөгжүүлэх ёстой,

3.Хүнсний бүтээгдэхүүний үйлдвэрлэл, дотоодын бүтээгдэхүүнээ бүрэн хангаж мал аж ахуй, газар тариаланг эрчимжүүлэн хөгжүүлж, бүс нутагтаа органик хүнс экспортлогч орон болох,

4.Хүнд болон хөнгөн үйлдвэр барьж, байгалийн баялаг, малын гаралтай түүхий эдийг эцсийн бүтээгдэхүүн болгон боловсруулдаг аж үйлдвэржсэн экспортлогч орон болох,

5.Авто зам, төмөр зам, агаарын зам, байгалийн хийн хоолой зэрэг дэд бүтцийн үндэсний сүлжээг барьж хэвтээ болон босоо тэнхлэгийг холбосон тээвэр ложистикийн нэгдсэн сүлжээг бий болгож олон улсын болон бүс нутгийн сүлжээнд холбох замаар транзит улс болон хөгжих,

6.Аж үйлдвэрийн дөрөвдүгээр хувьсгалын цөм технологи болох хиймэл оюун ухаан, блокчэйн, робот, интернетийн их өгөгдлийг нэвтрүүлэн инновацийн үйлдвэрлэлийг хөгжүүлж цахим үндэстэн, дижитал Монгол болох ёстой,

7.Нүүдэлчдийн соёлд түшиглэсэн зан заншил, соёлын бүтээлч үйлдвэрлэл, түүхэн болон байгалийн аялал жуулчлалыг хөгжүүлэн эдийн засгийн тэргүүлэх салбар болох учиртай,

8.Банк санхүү болон хөрөнгийн зах зээлийг хөгжүүлж ухаалаг системийг нэвтрүүлэн олон улсын худалдаа хөрөнгө оруулалтын идэвхтэй тоглогч болж, Монгол улс бүс нутгийн санхүү хөрөнгө оруулалтын шинэ төв болох,

9.Орон зайн оновчтой бүтэц, суурьшлын зөв тогтолцоотой метрополитан хотуудыг хөгжүүлж, хот хөдөөгийн хөгжлийг хурдасган улс орноо бүсчлэн хөгжүүлэх,

10.Эх дэлхийгээ шүтэн хайрладаг хүн ардтай, экологийн тэнцвэрт байдлыг хадгалан хамгаалдаг төртэй, ногоон монгол болох зэрэг зорилтууд болно. Эдгээр зорилтыг биелүүлснээр монгол улс хүчирхэг эдийн засагтай хөгжингүй улс болно гэж үзэж байна. Иймээс Монгол улсын засгийн газар алхмуудыг цаг алдалгүй хийх ёстой. Нэн ялангуяа эдийн засгийн дархлаагаа дэмжиж, эдийн засгийн эмзэг байдлаа бууруулах хариуцлагатай он жилүүд биднийг хүлээж байна” хэмээн хэллээ.

Т.Мөнхжаргал