УИХ-ын чуулганы ээлжит хуралдаан болж байна. Чуулганаар Засгийн газраас өргөн барьсан Шинэ сэргэлтийн бодлогыг батлах тухай УИХ-ын тогтоолын төслийг хэлэлцэж байна. Энэ үеэр УИХ-ын гишүүн С.Ганбаатар үг хэлж, асуулт асуулаа. Тэрбээр “Хамгийн гол асуудал бол мөнгө хаанаас олон вэ. Том төслийг хэн ч хийж хэрэгжүүлж болно. Өр, зээл тавиад хөгжсөн улс энэ дэлхий дээр байхгүй. Энэ мөнгийг “Нарантуул”-ын худалдаачид, жижиг дунд үйлдвэрлэчид, малчид, багш, эмч нараасаа татвар нэмэх байдлаар авна гэвэл боломжгүй зүйл. Сая Манжийн дарлалаас чөлөөлөгдсөн ойг тэмдэглэлээ. Тэгвэл одоо бид Манжийн үеэсээ дор орсон мөнгө хүүлэлтийн бодлогод талхилагдаж байгаа ард түмэн. Өр зээлийг дөрөвдүгээр ангийн хүүхэд ч тавьж чадна. Уул уурхайн баялагаа Монголын ард түмэнд үр өгөөжтэй байж 27 их наядыг олно гэж үзэж байгаа. Дөнгөж сая ярьсан “Оюу Толгой”-н тогтоолыг УИХ-ын дарга, Ерөнхий сайд Монголын ард түмний талд байсан тулдаа гаргалаа. Улс төрчид “Оюу Толгой”-д бараа бүтээгдэхүүн шахдаг. Хэн хэн бараа шахдагийг бүгд мэддэг. Нэр дурдаж чадна даа. Даанч гэр доторх хулгайч зодолдвол гадна талд байгаа хулгайч баярлачих гээд байдаг. Нэг хэсэг нь бүлэглэл болчихсон, нөгөө хэсэг нь ард түмний талд. 18 жил ингэж зодолдож ирлээ. “Оюу Толгой” бол зүгээр нэг загвар. Бусад бүх уул уурхайн төслүүд “Оюу Толгой”-г дагаж явна” хэмээн хэлэв.

Б.Жаргал