Он солигдох торгон мөчийг тохиолдуулан УИХ-ын дарга Г.Занданшатар ард түмэндээ хандаж, баярын мэндчилгээ дэвшүүллээ.

Дэлгэр монгол орондоо болон дэлхийн өнцөг булан бүрт аж төрөн амьдарч суугаа элэг нэгт эрхэм хүндэт монголчууд аа. Та бүхэндээ угтан золгож буй шинэ оны баярын мэндчилгээг өргөн дэвшүүлье. Улирч байгаа 2021 он дэлхий дахиныг хамарсан “Ковид-19” цар тахал улс орны эдийн засаг, иргэдийн ажил амьжиргаанд амаргүй бэрхшээл үүсгэсэн. Гэсэн ч төр засаг, түмэн олон маань хүчээ нэгтгэж, гарз хохирлыг багасгах чиглэлээр хамтран чармайсны үр дүн гарлаа. Цар тахлын үед ч УИХ тасралтгүй хуралдаж, олон чухал хууль, бодлого шийдвэр гаргалаа. Коронавирусний халдварын цар тахлаас урьдчилан сэргийлэх, тэмцэх, нийгэм эдийн засагт үзүүлэх сөрөг нөлөөллийг бууруулах тухай хуулийг  цаг алдалгүй хэлэлцэн баталж, дахин сунгалаа. Энэ хуулийг хэрэгжүүлэх ажлын хүрээнд УИХ, Засгийн газраас эрүүл мэндээ хамгаалж, эдийн засгаа сэргээх 10 их наяадын цогц төлөвлөгөө хэрэгжүүлсэн нь үр дүнгээ өглөө.

Ажлын байрыг дэмжих, гурван хувийн хүүтэй зээлийн хүрээнд нийт 1,9 их наяд төгрөгийн зээлийг 5.591 ААН, 19.566 иргэнд олгосон байна. Монгол Улсын Үндсэн хуульд оруулсан нэмэлт өөрчлөлтийг амилуулах эрх зүйн хувьсгал амжилттай үргэлжилж байна. Шүүхийн бие даасан хараат бус байдлыг хангах үндсэн үзэл баримтлалтай шүүхийн тухай багц хуулийг баталлаа. Энэ хуулиар зөвхөн хууль засагладаг, шударга ёс зүйтэй хуулийн тогтолцоо төлөвших учиртай. УИХ хүний эрхийг эн тэргүүнд эрхэмлэнэ гэдгээ тунхаглан зарласан. Монгол хүн үндсэн хуулиар олгосон эрх, эрх чөлөөгөө бүрэн эдэлж байх ёстой. Монгол хүний эрх хаана ч зөрчигдөх ёсгүй. Тиймээс хүний эрх хамгаалагчийн тухай хуулийг ази тивд анх удаа батлан гаргалаа. УИХ парламентийн шинэчлэлийн бодлогоо тууштай хэрэгжүүлж байна. Энэхүү шинэчлэл ард түмний засаглах эрхийг хангах, иргэдтэйгээ хамтран хууль боловсруулж баталдаг болох, парламентийн үйл ажиллагааг сонгодог зарчимд нь нийцүүлэх, иргэдийнхээ парламентийн боловсролыг дээшлүүлэх зэрэг чиглэлээр амжилттай өрнөж байна. УИХ хууль тогтоохын зэрэгцээ түүний хэрэгжилтийг хянан шалгах чиг үүрэгт эн тэнцүү анхаарах болно.

Энэхүү үйл ажиллагааг бид ард түмэнтэйгээ хамтран хийх болно. Ингэснээр сонгодог парламент болох шинэчлэлийн нэгэн шинэ үе шат эхэлж байгаа юм. Баялгийн хуваарилалтыг тэгш шударга болгох, үр өгөөжийг улсын хөгжил иргэдийнхээ сайн сайханд зориулах үндэсний баялгийн сангийн, боловсрол мэдлэгийн үр шимийг дэлхийн төвшинд эзэмшин хүртэх боловсролын шинэчлэлийг бид шинэ оны эхний хагаст багтаан бүрдүүлэх болно. Эрхэм хүндэт ард иргэдээ. Нэгэн зууны тэртээ өвөг дээдэс минь эх орныхоо тусгаар тогтнол, бүрэн эрхт байдлын төлөө ард ноёд, лам гэлтгүй бүгдээр нэгдэн зүтгэж, ялалтад хүрснийг түүх гэрчилнэ. Одоо Монгол Улсын тусгаар тогтнолд эргэлзэх нэг ч хүн байхгүй. Бидэнд эдийн засгийн тусгаар тогтнол нэн чухал байна. Боломжтой бүхнээ өөрсдөө үйлдвэрлэж, бололцоотой салбар бүрд экспортын үйлдвэрлэл хөгжүүлж, дэлхийн төвшний техник технологийг эзэмшсэнээр бид энэ тусгаар тогтнолд хүрч чадна. Энэ бүхнийг зөв мэргэн төрийн бодлого, хаан хуулиар хэрэгжүүлнэ.

Ард түмнийхээ шууд сонголтоор сонгож байгуулдаг төр засаг, хүний эрх, чөлөөт зах зээлийг эрхэмлэдэг ардчилсан засаглал, дэлгэр монгол нутагтаа дүүргэсэн мал сүрэг, цэнгэг ус, ариун агаар, ариун баялаг эрдэнэс агуулсан газар нутаг бидэнд бий. Тиймээс Монголынхоо төлөө цохилох зүрхтэй хүн бүхнийг эвийн хүчээ нэгтгэн, эдийн засгийн талаар тусгаар тогтнож, хөгжин цэцэглэсэн шинэ монголыг бүтээхийн төлөө хамтран зүтгэхийг шинэ оны босгон дээр монгол түмэндээ хандан уриалъя. Монгол эх орон маань сэргэн мандлын шинэ замдаа тууштай орж, монгол түмний маань золбоо хийморь бадарч, монгол өрх бүрд аз жаргал бялхах болтугай. Сайн цаг, сайхан ирээдүйд хөтлөх 2022 оноо айл өрх, ахан дүүсээрээ баяр жаргал дүүрэн сайхан угтаарай. Шинэ оны мэнд хүргэе.