УИХ дахь О.Цогтгэрэл тэргүүтэй Ардчилсан намаас мэдээлэл хийлээ. Энэ үеэр УИХ-ын гишүүн О.Цогтгэрэл “УИХ-д бүлэгтэй намын хувьд эрх баригчдад үнэлэлт дүгнэлт өгөх ёстой. Цар тахлын үед Монгол Улс дотоодын нийт бүтээгдэхүүнийхээ 20 орчим хувийг дэлхийн жишгээр асар өндөр зардал гаргасан, энэ зардлын цаана өр нэмэгдэж байгаа. Асар их өр тавьсан улсын тоонд орж байгаа. Үүний цаана олон мянган ажлын байр алдагдаж, уул уурхайн төслүүд зээл авч, халамж тарааж өдөр хоногийг өнгөрөөж байна. Эдийн засгаа боловсруулах бодлогоос илүүтэй пиараа эрчимжүүлсэн олон бодлогыг бид үзэж, харж, сонсож байна. Өнгөрсөн долоо хоногт зарласан Эдийн засгийн шинэ сэргэлтийн бодлогыг тоймлоод харвал асар олон төрийн өмчит аж ахуй нэгжүүдийг байгуулна гэсэн үг. Төрийн оролцоо ирэх жилүүдэд улам нэмэгдэх юм байна. Санхүүжилт нь тодорхойгүй төсөл гэдэг чинь хувийн хэвшил тэнд оролцох боломж хомс учраас улсын өр нэмэгдэнэ гэсэн үг. Арванхоёрдугаар сарын 20-нд Дээд шүүхийн нийт шүүгчдийн хуралдаан болсон. Харин арванхоёрдугаар сарын 31-ний үдээс хойш Дээд шүүхээс бидэнд тогтоол ирүүлсэн. Энэ тогтоолд “UB Place”-т болсон Онц их хурлыг хүчин төгөлдөр гэж үзжээ. Намын даргын асуудал шийдэгдээгүй байгаа боловч манай талд байгаа үндэсний бодлогын хороог хууль ёсны хүчин төгөлдөр гэж Улсын дээд шүүх үзжээ. Ардчилсан нам төлөөллийг төв байгууллагаараа дараа дараагийн шийдвэрээ гаргаад ажиллах боломж бололцоо бүрдэж байна. Нөгөө талд байгаа Үндэсний бодлогын хороог хүчин төгөлдөр бус гэж Дээд шүүх үзсэн гэж ойлгож байна. Ардчилсан намын бүлэг цаашид хэвийн олонх дээрээ тулгуурлаад үйл ажиллагаагаа явуулна. Олон нийтийнхээ шийдвэрт хүндэтгэлтэй хандана гэдэгт Д.Ганбат даргад бид бүхний зүгээс итгэлтэй байна.  

Б.Жаргал