Улсын дээд шүүх О.Цогтгэрэлийн тэргүүлж буй АН-ын Онц их хурлыг хууль ёсны гэж тогтоосныг бүлгийн гишүүд мэдэгдлээ. Энэ үеэр УИХ гишүүн Н.Алтанхуяг хэлсэн үгэндээ “УИХ 2000 оны долоодугаар сараас эхлэн үйл ажиллагаа явуулаад нэг жил зургаан сар ажиллаж байна. Энэ хугацаанд бид УИХ гишүүн гээд явахад ард иргэдийн, аж ахуй эрхлэгчдийн, улс орны эдийн засгийн байдал гээд туйлын хүнд байдалд явж ирлээ. Мэдээж гамшигт өвчин гарсан. Үүний эсрэг тэмцэлгүй яах вэ. Гэвч төсөв мөнгө мэддэг эрхээ хуулиар Засгийн газарт өгчихсөн. Тэр хавиар дураараа дургиж, дунд чөмгөөрөө жиргэлээ. Саяхан дахин Омикрон гэж айлгаад зургаан сараар сунгая гэхэд манай бүлгийн гишүүд эсэргүүцсэн. Гэсэн ч олонхийг дийлсэнгүй.

Монгол руу орж гардаг гарцууд хаагдчихсан, ард түмний амжиргаа муудсан, юмны үнэ тэнгэрт хадчихсан байхад эх баригчид 30 жилийн дараа сайхан амьдарна гэсэн сайхан зүйл ярих юм. 30 жил биш ойрын хоёр, гурван жилд ард түмний амжиргаа дээрдэх юм уу, үгүй юу. Дэндүү шударга бус байдал Монголд газар авчихжээ.

Хэдэн арван тэрбум төгрөгийн хээл хахууль өгч авсан хүмүүс нь хэдэн сая төгрөгөөр торгуулаад гарч байна. Харин нийгмийн бусад хэсэгт хууль хамгийн хатуу, харгис чангаар үйлчилж байна. Ардчилсан намын төлөө, Монгол улс ялахын төлөө, улс нь улс шиг байж, иргэд нь баян байх нийгмийн төлөө зүтгэж явсан юм. Манай намд ямар ч асуудал болоогүй. Нэг нам байсаар ирсэн. Тухайлбал, 21 аймаг, 330 сум, есөн дүүрэгт тамга, тамдэгтэйгээ нэг талдаа байгаа. Нэг талдаа гэдэг нь О.Цогтгэрэлийг сонгосон талд. Ийм байхад АН үүнийг хоёр нам мэт болгож, Ерөнхийлөгчийн сонгуульд бэлдэж, улс орон даяар шударга бус зүйлийг МАН-ын мөнгөтэй хэсэг бүлэг хүмүүс болон манай намын мөнгө идсэн хүмүүс хийсэн юм. Монголын хоёр том багананы нэг болох АН-аар энэ хэдэн нөхөд тоглоом хийлээ. Харин  Улсын дээд шүүхийн шийдвэр оны хамгийн сүүлийн өдөр гарч, АН хүчин төгөлдөр гэж дүгнэсэн. Улсын дээд шүүх намын бүртгэлийг 30 хоногийн дотор шийдэх ёстой байдаг. Гэтэл дээд шүүхийн 20 гаруй шүүгчид хуулиас дэвсан журам гаргасан байна. Хуулиас давсан журмыг Улсын дээд шүүх гаргаж болохгүй. Үүний эсрэг бид тэмцэнэ. Мөн МАН төрийн байгуулагын зарим хүмүүсийг ашиглаж, хэрхэн АН-аар тоглосон жүжгийг бид ил болгон тавина. Ингээд явбал, үхэр тэргээр туулай гүйцдэг гэдэг. Үнэнээр явсан Ардчилсан нам үхэр тэргээр туулайг гүйцэх гэж байна. Үүнээс цаашид 13-уулаа ядарч, доройтож байгаа ард түмний эрх ашгийн төлөө тууштай тэмцэнэ” хэмээн мэдэгдлээ.

Д.Батчулуун