УИХ дахь АН-ын бүлгийн гишүүд өчигдөр мэдээлэл хийж, “Ub palace”-д болсон АН-ын Онц их хурлыг Дээд шүүхээс хүчин төгөлдөр гэсэн тогтоол гарсан тухай мэдээлсэн. Уг Онц их хурлаар АН-ын даргаар О.Цогтгэрэлийг баталсан билээ. Дээд шүүхийн тогтоолыг танилцуулсан АН-ын бүлгийн гишүүдийн хийсэн хурлын үеэр УИХ-ын гишүүн Н.Алтанхуяг АН-ыг самарч байгаа гурван хүнийг нэрлэсэн. Тэрээр, “Энэ хавар манай намын бүлгийн 13 гишүүн нэгэн цул болон “Монголд шударга бус байдал хэрээс хэтэрлээ, нэг намын дарангуйлал тогтлоо.Төрийн хэдэн байгууллага, түүний хэдхэн дарга нар АН-ын хувь заяаг хууль бусаар шийддэг боллоо” гээд талбай дээр гарч өлсгөлөн зарласан. Өлсгөлөнг УИХ-ын дарга Г.Занданшатар, МАН-ынхан “Та нар ордонд ороод ир ээ, тойрч суугаад төрийн байгууллагын ажилтан, алба хаагчид үнэхээр хууль ном зөрчсөн бол бид хяргаад өгнө” гэж хэлээд өлсгөлөнг буулгасан. Түүнээс хойш долоо найман сар өнгөрлөө. Нөгөө хэлээд байсан асуудлуудыг УИХ руу оруулж ирдэггүй. Яагаад УИХ руу оруулж ирэхээс яагаад айгаад байгаа вэ гэхээр Бүртгэлийн байгууллага дээр, МАН-ын нөлөөллөөр булхай хийчихсэн л байхгүй юү. Бүртгэлийн даргыг өнөөдөр хэн удирдаж байгаа юм гэхээр С.Бямбацогтын компанийн нэг нөхөр оччихсон. Тэр хүн АН-ын тамганы будилааныг эхлүүлсэн. Сонгуулийн ерөнхий хорооны дарга П.Дэлгэрнаран гэж бас нэг хүн байгаа. У.Хүрэлсүхийн суганы үс болж явдаг. Төрийн байгууллагад ажиллаж байхдаа төрийн байгууллагын ажлыг завхруулаад халагдаж байсан нөхөр. Ийм хүн Монгол Улсын Сонгуулийн ерөнхий хорооны  дарга болчихсон явж байна. Ийм ийм асуудлууд нь УИХ дээр орж ирээд, олон түмэнд хэлэлцэгдэж ил болно гэдгээс айгаад өнөөдрийг хүртэл оруулж ирэхгүй байгаа юм. Улсын Дээд Шүүхийн Тамгын газрын даргын үүрэг гүйцэтгэгч С.Амардэлгэр гэдэг нөхөр байгаа. Тэр хүн өөрөө гэмт хэрэгт холбогдсон байж Улсын Дээд Шүүхийн даргын үүрэг гүйцэтгэгчээр ажиллаад явж байгаа. Бас л МАН-ын мөнгөтэй бүлэглэлийн гарт барьцаанд орсон хүн гэсэн үг. Энэ хэд АН-ын тамганы будилаан тарьж, самарч байна” хэмээсэн билээ. Тэгвэл Н.Алтанхуяг гишүүний хэлсэн АН-ыг самарч байгаа гурван хүнийг танилцуулъя.

Улсын Дээд Шүүхийн Тамгын газрын даргын үүрэг гүйцэтгэгч С.Амардэлгэр

С.Амардэгэр нь 2003 онд Халх журам хууль зүйн дээд сургуулийг эрх зүйч мэргэжлээр, 2015 онд Олон улсын Улаанбаатар их сургуулийг эрх зүйн магистраар төгсчээ. Түүний ажил мэргэжлийн хувьд

• 2003 оны 5-11 дүгээр сард Баянзүрх дүүргийн шүүхэд жижүүр;
• 2003- 2006 онд Сонгинохайрхан дүүргийн шүүхэд шүүгчийн туслах бөгөөд шүүх хуралдааны нарийн бичгийн дарга;
• 2006-2011 онд Шүүхийн Ерөнхий Зөвлөлд шүүхийн Сахилгын хорооны хянан шалгагч;
• 2011-2013 онд Сонгинохайрхан дүүргийн шүүхэд  шүүгч;
• 2013-2015 онд Дүүргийн иргэний хэргийн  анхан шатны 1-р шүүхэд шүүгч;
• 2015-2016 онд Баянзүрх,  Сүхбаатар, Чингэлтэй   дүүргийн иргэний  хэргийн анхан шатны шүүхэд шүүгч;

• 2016- Баянзүрх дүүргийн иргэний хэргийн анхан шатны шүүхэд шүүгч,

Харин 2019 онд Салхитын мөнгөний ордын хэрэгт холбогдуулан Ерөнхийлөгчийн зарлигаар түүний ерөнхий шүүгчийн бүрэн эрхийг түдгэлж байв.

Сонгуулийн ерөнхий хороон дарга П. Дэлгэрнаран

1989 онд ЗХУ-ын Цэргийн дээд сургуулийг Улс төрийн ажилтан мэргэжлээр төгсч ирээд МУИС-ийг Эрх зйүч мэргэжлээр 1996 онд төгсжээ. Харин түүнээс хойш дараах байгууллагуудад ажилласан байна.

• 1989-1990 онд Талх чихрийн үйлдвэрийн МХЗЭ-ийн хорооны дарга;
• 1990-1991 онд Улаанбаатар хотын МХЗЭ-ийн хорооны дэд дарга;
• 1991-1993 онд Улаанбаатар хотын Залуучуудын холбооны дарга;
• 1993-1995 онд Хүн амын бодлого, хөдөлмөрийн яаманд ахлах түшмэл;
• 1995-1997 онд Монгол Улсын Их Хурал дахь намын бүлгийн референт;
• 1997-1999 онд “Прогноз” төвд эрдэм шинжилгээний ажилтан;
• 1999-2000 онд Үндэсний соёл амралтын хүрээлэнгийн захирал;
• 2000-2003 онд Нийслэлийн өмчийн харилцааны газрын дарга;
• 2003-2005 онд Нийслэлийн Баянзүрх дүүргийн Засаг даргын орлогч;
• 2007-2012 онд “Автобус-3” компаний захирал;
• 2012-2013 онд Засгийн газрын хэрэгжүүлэгч агентлаг Автотээврийн газрын дарга;
• 2015-2020 онд “Автотээврийн үндэсний төв” төрийн өмчит үйлдвэрийн газрын тэргүүн дэд захирал, захирал, захирлын зөвлөх;
• 2020 онд Монгол Улсын Их Хурлын Тамгын газарт ахлах референт;
• 2020.8.28-наас Сонгуулийн ерөнхий хорооны даргаар ажиллаж байна. 

Түүнийг 2005 онд Баянзүрх дүүргийн Засаг дарга Э.Мөнх-Очир захирамж гарган “албан үүргээ биелүүлээгүй, удаа дараа архидан согтуурсан, ЗДТГ-ын нярваас албан бус зориулалтаар бэлэн мөнгө авч, буцаан төлөөгүй, эрх хэмжээний дагуу зарцуулах унааны зардлыг хэтрүүлсэн” зэрэг үндэслэлээр Засаг даргын орлогчийн үүрэгт ажлаас халж байв.

Улсын бүртгэлийн ерөнхий газрын дарга Д.Дэлгэрсайхан

Тэрээр 2016 оноос хойш УБЕГ-ын дэд даргаар ажиллаж байсан ба өнгөрсөн оны наймдугаар сард УБЕГ-ын даргаар томилогдон ажиллаж байна. Монгол Улсын Техникийн Их Сургуулийг 1997 онд компьтерийн программ хангамжийн чиглэлээр  бакалаврын зэрэг, 1999 онд магистрант, 2011 онд докторантаар төгссөн байна.

Тэрбээр, УИХ-ын гишүүн С.Бямбацогтын үүсгэн байгуулсан “Ньюпрогресс” группийн дэд ерөнхийлөгчөөр ажиллаж байгаад УБЕГ-ын дэд дарга, даргаар томилогдсон билээ.

Т.Мөнхжаргал