Ковидын хуулийн дагуу сонгон шалгаруулалтгүй томилогдсон албан тушаалтнуудыг үүрэгт ажлаас нь чөлөөлж, сонгон шалгаруулалт зарлах тухай Төрийн албаны зөвлөлийн 411 тоот тогтоол өнгөрсөн арванхоёрдугаар сарын 30-нд гарсан. Ингэж томилогдсон албан хаагчдыг заасан хугацаанд чөлөөлөхийг Төрийн албаны зөвлөлөөс төрийн байгууллага, Төрийн албаны салбар зөвлөлд үүрэг болгоод буй юм. Нэг ёсондоо Төрийн албаны салбар зөвлөлийн дарга нөрт энэ үүрэг оногдож байгаа. Сонгон шалгаруулалтгүй томилогдсон албан тушаалтнуудын дунд таван Төрийн нарийн бичгийн дарга, 17 агентлагийн дарга байгаа билээ.

Таван төрийн нарийн бичгийн дарга нь Эрүүл мэндийн яамны Төрийн нарийн бичгийн дарга Ц.Эрдэмбилэг, Соёлын яамны Төрийн нарийн бичгийн дарга С.Оюунбилэг, БСШУ-ы яамны Төрийн нарийн бичгийн дарга Л.Цэдэвсүрэн, Батлан хамгаалах яамны Төрийн нарийн бичгийн дарга Д.Ганхуяг, Эрчим хүчний яамны Төрийн нарийн бичгийн дарга Б.Насантогтох нар юм. 

Төрийн албаны салбар зөвлөлүүдийг яамдын Төрийн нарийн бичгийн дарга нар тэргүүлдэг бөгөөд Төрийн албаны зөвлөлөөс эдгээр Төрийн нарийн бичгийн дарга нарт буюу салбар зөвлөлийн дарга нартаа үүрэг өгсөн гэсэн үг. Төрийн албаны зөвлөлийн үүрэг бол салбар зөвлөлийнхөнд заавал биелүүлэх “хууль” байдаг. Тэгвэл өөрсдөө сонгон шалгаруулалтгүйгээр томилогдсон эдгээр салбар зөвлөлийн дарга нар өөрсдийн салбар зөвлөлд харьяалагддаг агентлагуудын сонгон шалгаруулалтгүй томилогдсон дарга нарыг үүрэгт ажлаас нь чөлөөлж чадах уу гэсэн асуулт зүй ёсоор гарч ирж байна.

С.Сүлд