Холбооны эрх зүйн байдлын тухай хууль болон уг хуулийн төсөлд холбогдуулан боловсруулсан бусад хуулийн төслийг хэлэлцэж байна. Энэ үеэр УИХ-ын гишүүн Б.Энхбаяр үг хэллээ. Тэрбээр “Шинэ хуулийн төслийг дэмжиж байна. Хэдэн жил хэлэлцүүлэгт байж орж ирэв. Засгийн газраас 2021 арваннэгдүгээр сарын 24-ны өдөр өргөн барьсан байгаа. Энэ бол сүүлийн дөрөв, таван жил яригдаж байгаа төрийн бус байгууллагын хууль. Бид төрийн бус байгууллага гэдэг нэрэндээ дасчихсан. Уг нь 20 жилийн өмнө Иргэний хуулиа гаргахдаа Сан холбоо гэдэг нэршлээ Иргэний хуулиндаа оруулчхаад хаячихсан.

Үүнийг 20 жил буруу нэрээр явуулсан. Одоо зөвтгөн оруулж байгааг дэмжиж байгаа. Ерөнхий сайд, МАН-ын дарга удаа дараа хэлж байгаа. Авилга ашиг сонирхолтой тэмцэх асуудал бол их барьж байгаа МАН-ын  нэгдүгээр бодлогын асуудал. МАН үүнийг Их хурлаараа албан ёсоор хэлчихсэн. Авилга ашиг сонирхлын зөрчилтэй тэмцье гэвэл бодлогын төвшинд тэмцэх ёстой. Яг энэ хүрээнд орж ирж байгаа асуудал хэмээн талархан дэмжиж байгаа. Харин Төрийн байгуулалтын байнгын хороогоор дэмжих бус Хууль зүйн байнгын хороогоор дэмжих нь зүйтэй. Учир нь Авилга, гэмт хэрэг,  мөнгө угаах терроризмтой тэмцэх асуудал Хууль зүйн байнгын хорооны шийдэх асуудал байдаг.

Манай улсыг Олон улсын байгууллагууд саарал жагсаалтад оруулсан. Ингэхдээ таван шаардлага тавьсан. Үүний нэг нь төрийн бус байгууллагын хуулиа шинэчил гэсэн шаардлага бий. Тиймээс энэ хуулиа дэмжихгүй бол дахин саарал жагсаалтад орно” гэлээ.

Мөн “Өнөөдөр Засгийн газрын шударга өрсөлдөөн хэрэглэгчдийн газар дэргэдээ Мэргэжлийн нэгдсэн холбооны үндсэн зөвлөл байгуулж байна. Энэ яаж байгаа юм бэ? Холбоо иргэний нийгмийн байгууллага гэдэг төрөөс тусдаа, иргэний нийгмийн байгууллага байтал төр нь өөрөө иргэний нийгмийн байгууллага байгуулж байна. Үүнд Шадар сайд гүйгээд оччихсон байна. Үүнийг одоо хэлэлцэх эсэхийг хэлэлцэж байгаа хууль дээр хориглосон байгаа. Энэ нөхдүүд Ерөнхий сайдын бодлогыг эсэргүүцэж байгаа юм уу? Авилгатай тэмцэхийн тулд төрийн худалдан авах ажиллагаанд мэргэжлийн холбоодыг оруулна. Энэ утгаар нөгөө нөхдүүд нь өөрсдөө мэргэжлийн холбоо байгуулаад, тендер худалдаж авах гэж байгаа юм уу? Би шууд хардаж байгаа шүү” гэв.

Д.Батчулуун