Холбооны эрх зүйн байдлын тухай хууль болон уг хуулийн төсөлд холбогдуулан боловсруулсан бусад хуулийн төслийг хэлэлцэж байна. Энэ үеэр УИХ-ын гишүүн Ц.Мөнх-Оргил үг хэллээ. Тэрбээр “Энэ хууль орж ирээд, 1997 оны хуулийг цэгцлээд янзалчихвал зүгээр гэж бодоод байна. Гэхдээ хуулийн хэлэлцүүлэг маань эхнээсээ мордохын хазгай болчихлоо. Монгол Улс бүтцээрээ бол нэг бүрэлдэхүүн хэсэг нь Монгол төр, нөгөө бүрэлдэхүүн хэсэг нь иргэний нийгэм. Гэтэл Иргэний нийгмийн тухай гол хуулиа эсэргүүцэж байна гээд байдаг. Бид хууль батлахдаа Төрийн бус байгууллагуудын иргэний нийгмийн төлөөллийн бүх саналыг тусгах албагүй. Гэхдээ хамтраад, суугаад үүнийг ийм үндэслэлээр авна, авсангүй гээд хэлэлцэх хэрэгтэй байгаа юм. Гэтэл эхнээсээ буруу явчихлаа. Энэ хуулиар Төрийн бус байгууллага, Иргэний нийгмийг цэгцлэх гэж байгаа юм шиг буруу ярьж болохгүй. Энэ цэгцэлнэ гэдэг үг энэ тохиолдолд буруу утга агуулаад байна. Тухайлбал, Төрийн бус байгууллагууд эрхээ эдлээд, эвлэлдэн нэгдээд, нийгмийн хөгжилд боломжоороо туслаад явж байгаа. Тиймээс цэгцлэх биш дэмжих хэрэгтэй санагдаад байгаа юм. Эдгээр холбоонуудыг олон янзын холбоо болгочихлоо. Төлбөртэй, төлбөргүй, нийтэд тустай, төрийн байгууллагын дэргэд гээд хоорондоо хутгалдчихлаа. Өөрөөр хэлбэл, төрийн байгууллага, төрийн бус байгууллага хоёрын ялгаа байхгүй боллоо” гэв.

Д.Батчулуун