УИХ-ын Баасан гаригийн нэгдсэн чуулган үргэлжилж байна. Хуралдаанаар "Иргэдийн сурч боловсрох эрхийг хангах, хичээл, сурлагын хоцрогдлыг нөхөх, арилгах" арга хэмжээний талаар хэлэлцэж байна. Энэ үеэр УИХ гишүүн Д.Ганбат үг хэллээ. Тэрбээр “Одоогийн нөхцөл байдал хүнд байна. Манай ард түмэн эрхэм баян эрдэм ном, багшийг хүндэлдэг байсан. Сүүлийн арав, хорин жил энэ асуудал, боловсролын салбар үнэхээр хүнд болсон. Намайг бага байхад бид академик боловсролоор хичээллэдэг байсан. Байгалийн шинжлэх ухаан нь хоцордог. Кембрижийн боловсрол гээд нэг хэсэг их явлаа. Харин одоо Кембрижийн боловсрол хэрэггүй, үнэтэй байна гэх юм. Боловсрол үнэтэй байх ёстой. Үүнд бүх мөнгийг нь гаргах ёстой. Багш нарын цалин сүүлийн хэдэн жил маш бага байгаа. Тийм бага цалинтай хүмүүсээс бид яаж хариуцлага нэхэх юм бэ? Ийм хариуцлагатай ажлыг ийм бага хөрөнгө санхүүжилтээр, ийм ирээдүйгүй байдлаар хийж болохгүй. Л.Энх-Амгалан сайдын ярьж байгаа зүйл зөв л юм шиг байгаа юм. Гэхдээ зарим зүйл дээр санал нийлэхгүй байна.  Монгол хүүхдүүд хамгийн сайн, хамгийн оюуны чадавх өндөртэй хүүхдүүд. Гэтэл манай боловсролын салбар ийм сайн материалаар маш муу бүтээгдэхүүн хийж байна. Үүнд анхаарах хэрэгтэй. Монгол хүүхдүүд уйгаржин, кирилл, латин, монгол бичиг сурч байгаа.  Монгол хүүхдүүд шиг ачаалалтай хүүхдүүд байхгүй. Англи хэлийг хоёрдогч хэл болгоё гээд байсан юу болсон бэ? Таны ярьж байгаагаар бэлтгэж байгаа, орох гэж байгаа, цахим хичээлд бэлдэж байгаа зүйлс яриад байна. Бүтэн нэг сар ковид тараагүй байхад хичээлийг хаасан. Дэлхий нийтээрээ цахимаар ороод яваад байхад, бид хоцрогдолд орчихсон байна” гэлээ.