Төрийн албаны зөвлөл оны хамгийн сүүлийн хурлаараа 411 тоот тогтоолыг баталсан. Энэ тогтоолын дагуу төрийн жинхэнэ албаны нөөцөд бүртгэлгүй, хууль, албан тушаалын тусгай шаардлагыг хангаагүй сонгог шалгаруулалтгүйгээр томилогдсон албан хаагчдыг албан тушаалаас нь чөлөөлөхийг Төрийн албаны салбар зөвлөлийнхөнд үүрэг болгосон. Ингэснээр сүүлийн хоёр жилийн хугацаанд Ковидын хуулийн дагуу сонгон шалгаруулалтгүй томилогдсон Төрийн нарийн бичгийн дарга нар, агентлагийн дарга нар албан тушаалаасаа чөлөөлөгдөх ёстой байв. Албаны мэдээллээс харахад Төрийн албаны зөвлөлийн дээрх тогтоолын дагуу таван Төрийн нарийн бичгийн дарга, 17 агентлагийн дарга албан тушаалаасаа чөлөөлөгдөх “болзол” хангаад байгаа.

Олон нийтээс чамгүй оноо аваад байгаа Төрийн албаны энэ тогтоол гэхдээ хэрэгжих эсэх нь эргэлзээтэй. Өнгөрсөн пүрэв гарагт болсон Засгийн газрын ээлжит бус хуралдааны томилгооноос харахад шүү дээ.

Энэ хуралдаанаас шинээр байгуулагдаж байгаа хоёр яамны Төрийн нарийн бичгийн даргын түр орлон гүйцэтгэгчийг томилсон бөгөөд эдгээр нь өмнө нь сонгон шалгаруулалтгүйгээр агентлагийн дарга болж байсан Мэдээлэл, харилцаа холбоо, технологийн газрын дарга Б.Болор-Эрдэнэ, Үндэсний хөгжлийн газрын дарга Х.Батжаргал нар байлаа. Засгийн газрын ээлжит бус хурлаар энэ хоёр агентлагийг татан буулгасан бөгөөд дарга нарыг нь шинээр байгуулагдаж байгаа яамны Төрийн нарийн бичгийн даргаар түр томилсон нь энэ байв. Засгийн газрын энэхүү томилгоо нь “түр” гэсэн тодотголтой ч өөр өнцгөөс харвал Төрийн албаны зөвлөлийн арваадхан хоногийн өмнөх тогтоолд “Дунд хуруу” гаргасан шийдвэр байлаа.

Учир нь энэхүү хоёр агентлагийн дарга нь Төрийн албаны зөвлөлийн 2021 оны 411 тоот тогтоолоор албан тушаалаас нь чөлөөлөх ангиллын албан тушаалтнууд байв. Гэтэл тэднийг төрийн албаны хамгийн өндөр ангиллын албан тушаалд сонгон шалгаруулалтгүйгээр томилсон нь ингэж хэлэхэд хүргэж байна.  Уг нь яамны Төрийн нарийн бичгийн даргыг Төрийн албаны тухай хуулийн 25, 26. 27 дугаар зүйлд заасан журмын дагуу сонгон шалгаруулж, Засгийн газар зургаан жилийн хугацаагаар томилж, чөлөөлдөг. Төрийн нарийн бичгийн дарга нь тэргүүн түшмэлийн ангилалд хамаарах албан тушаал бөгөөд ийм тохиолдолд төрийн албанд 16-аас доошгүй жил, үүнээс эрхэлсэн түшмэлийн албан тушаалд 8-аас доошгүй жил ажилласан байхыг шаарддаг юм.

О.Балдан-Очир