УИХ дахь О.Цогтгэрэл даргатай Ардчилсан намын бүлэг өнөөдөр Төрийн ордонд мэдээлэл хийж, энэ үеэр УИХ-ын гишүүн Ж.Батсуурь тайлбар хийв. Тэрбээр “УИХ-ын тухай хуулийн 14.1-т УИХ-ын үйл ажиллагаанд Үндсэн хууль, бусад хуулийг сахин биелүүлэх ажлыг зохион байгуулах, 14.3-т Нам, бүлэг, эвсэл, байнгын хороодын үйл ажиллагааг уялдуулан зохицуулах үүрэг нь УИХ-ын даргын бүрэн эрхэд байгаа юм. Иймээс АН-ын бүлгээс хууль, дүрэмд заасны дагуу олонхоороо бүлгийн даргаа солиод гурван сар болж байна. Намын асуудал нэгэнт Дээд шүүхийн шүүгчдийн хурлаар шийдэгдсэн учраас оны эхний нэгдэх өдөр бүлгийн асуудлаа УИХ-ын даргад гаргаж тавьсан. УИХ бүрэн эрхээ хэрэгжүүлээч, УИХ-ын бүрэлдэхүүн хэсэг, нам эвсэлийн бүлэг, байнгын хороодын үйл ажиллагаагаа зохион байгуулалтанд нь оруулж өгөх хүсэлт тавилаа. Одоог хүртэл хойш тавиад байна. Бүлгийн гишүүдийн дийлэнх олонхийн хэсгийг хүлээж авахгүй цааргалаад байгаа нь улстөрийн шинжтэй үйл ажиллагаа болж байна. УИХ-ын даргад хоёр дахь удаагаа энэ мэдээллийг өгч байгаа. УИХ-ын дарга өөрийн бүрэн эрхэд оногдсон үйл ажиллагаагаа хэрэгжүүлэхгүй бол Үндсэн хуулийн цэцэд АН-ын бүлэг хандаж, УИХ-ын даргыг ажлаа хэвийн явуулж байгаа эсэх тал дээр дүгнэлт гаргуулах шийдвэрт хүрнэ.   

Б.Жаргал