УИХ дахь АН-ын бүлгийн хурал хуралдаж, Бүлгийн дарга, УИХ-ын гишүүн Д.Ганбат зарим зүйлд тайлбар хийлээ. Тэрбээр “Жагсаал цуглааны тухай хуулиа сайжруулая гэдэг зүйлийг бид бүхэн тавьсан. Нийт 37 гишүүн гарын үсэг зураад дэмжсэн. Гэвч энэ хэлэлцүүлэгийг Хууль зүйн байнгын хороон дээр нэг төдий явууллаа. Ирц нь хүрэхгүй, оролцох хүсэлтэй иргэдийг оролцуулаагүй. Ийм зүйл явуулсантай АН санал нийлэхгүй байна. Өнөөдөр АН-ын бүлэг найман гишүүнтэй. Бүлгийн хуралд миний бие, Б.Пүрэвдорж гишүүн суусан. Гадаадад ажиллаж байгаа Д.Бат-Эрдэнэ, С.Одонтуяа нарын гишүүн байна. Эмнэлэгт А.Адъяасүрэн гишүүн байгаа. Ингэж хуралдлаа. Бүлгийн хурал 11:00 цагт эхэлж, хурлаар хуулийн талаарх мэдээлэл сонсож, танилцсан. Манай намын бүлэгт байгаа О.Цогтгэрэл, Б.Бейсен нар өөр газар зогсож байгаа харагдана лээ. Тэд Төрийн ордонд байгаа хэрнээ хуралдаа суухгүй, янз бүрийн мэдээлэл хийгээд яваад байна. Ер нь танил технологи шүү дээ. Хэн нэгэн гэмт хэрэгт барьцаалагдсан нөхдүүд нам бүлэг рүү дураараа орж ирдэг. 2016-2020 онд бас АН-ыг бүлэггүй болгож байсан. Захиалгатай сэтгүүл зүй бий болгосон. Тэгээд хуулийн байгууллагыг дарамталж эхэлдэг. Хүссэн шийдвэрээ гаргуулдаг. Ийм технологи яваад байна. АН-д УИХ-ын гишүүн С.Ганбаатар МАХН-аас нэр дэвшиж сонгогдсон, Н.Алтанхуяг бие дааж сонгогдсон. Ийм хүмүүс. Тэдэнд АН-ын бүлэг, АН түй ч хамаагүй. Яагаад манай намын нэрийг бариад, тэнд худлаа үнэн юм яриад, хэвлэлээр бусдыг дарамтлах үйл ажиллагаа явуулж байгаад харамсаж байна. Уучлалт гуйх байлгүй дээ. Энэ асуудлыг Ёс зүйн хороонд нь тавина. Ер нь Монгол Улс хуультай, АН дүрэмтэй.

Б.Жаргал