2022 оны улсын төсвийг батлагдсаны дараа Сангийн яам энэ төсвийг дотоодын эдийн засгийг гурав дахин тэлэх томоохон төслүүдийг дэмжих, ажлын байрыг нэмэгдүүлэх, төрийн үйлчилгээний чанар, хүртээмжийг нэмэгдүүлэх, төрийн байгууллагын зардлыг хэмнэх, хотын түгжрэлийг бууруулахад чиглэсэн “хөдөлмөр, бүтээмж, өсөлт”-ийг дэмжих төсөв боллоо хэмээж байв.

Ингэж нэрлэсэн төсвөөр энэ онд 2.5 их наяд төгрөгийн хөрөнгө оруулалт хийхээр баталсан. Үүний 1.8 их наяд нь зам тээвэр, эрчим хүч, барилга бүтээн байгуулалтын салбарт хуваарилагдаж байлаа. Гэсэн ч төд удалгүй төсвийн задаргаанууд гарч ирэхэд хэрэгцээгүй олон хөрөнгө оруулалт бүтээн байгуулалтууд ил болсон.

Үүний нэг нь Соёлын сайдын багцад “нуугдсан” Богд Зонховагийн цогцолбор байв. Тасганы овоон дээр байгуулах энэ цогцолборыг анх 5.5 тэрбум төгрөгөөр барихаар төсөвт суулгасан байсан боловч хэлэлцүүлгийн явцад Ц.Цэрэнпунцаг нарын гишүүний саналаар барих төсөв нь 32 тэрбум төгрөг болон өсч, энэ улсын төсөвт суусан. Богд Зонховагийн хөшөөний “хэрэг” ил болох үед санаачилсан гишүүд нь ч мэлзэж нэг үзэж, багцад нь суусан сайд нь ч мэдээгүй болж жүжиглэж байлаа.

Тэрч байтугай Соёлын сайд Ч.Номин өөрийнх нь багцад суулгасан Богд Зонховагийн хөшөөнд зарцуулах 32 тэрбум төгрөгийг өөр зүйлд зарцуулахаа мэдэгдсэн. Ч.Номин сайдын энэхүү мэдэгдэл нь олон хүнд таалагдсан ч хууль журмын хувьд дан ганц сайдын мэдэж шийддэг асуудал биш байлаа. Энэ нь төсөв батлах бүрэн эрхтэй УИХ-ын халдашгүй эрхэд халдсан хэрэг байв. Харин энэ удаа Засгийн газар Ч.Номин сайдын мэдэгдлийг залруулахаар болж байх шиг байна.

Учир нь, Засгийн газар энэ оны төсөвт тодотгол хийхээр болж, хуулийн төслөө тун удахгүй УИХ-д өргөн барих гэж байна. Цагаан сарын өмнө Төсвийн тодотголыг хийж амжуулах тухай эх сурвалж хэлж буй бөгөөд энэ тодотголоор Богд Зонхова зэрэг шаардлагагүй, цаг үеэ олоогүй хөрөнгө оруулалт, бүтээн байгуулалтын зардлуудыг хасаж энэ бүхнийг цалин тэтгэвэр, нийгмийн халамж руу зарцуулахаар болж байгаа юм байна.

О.Балдан-Очир