Хууль зүйн байнгын хорооны хуралдаан болж байна. Энэ үеэр УИХ-ын гишүүн Ш.Адьшаа асуулт асууж, санал хэлэв. Тэрбээр УИХ-ын даргын захирамжаар байгуулагдсан ажлын хэсгийн дүгнэлтийг уншлаа. Их харамсаж байна. Ерөнхийлөгчийн сонгуульд зориулж шийдэл гаргасан энэ асуудал сонгууль дууссан учраас зөв дүгнэлт гаргаж, Монголын төр цаашид ийм байх үгүйг шийдэх ёстой.

Улсын бүртгэлийн тухай хууль, бусад хууль тогтоомжууд дээр аливаа байгууллагын тамга тэмдгийг олгож байсан дүрэм журам байна. Тангарга өргөсөн хүмүүс яагаад ийм дүгнэлт гаргав. Хурал даргалагч Мөнх-Оргил гишүүн шүүхэд нөлөөлөх гэлээ гэж хэлж байна. Та нар шүүхийн тогтоолыг авч хэлэлцэж байгаа. Өөрсдөө тийм дүгнэлт гаргасан. Шүүх хурал маягийн юм болгож байна. Жинхэнэ АН, хуурамч АН гэж явахаа боль. УИХ-ын асуудал хэлэлцдэг дэгийн хууль энд байна уу. Ц.Мөнх-Оргил гишүүн та энэ заваан юм аа боль оо. Тантай яривал зөндөө юм бий. Долдугаар сарын 1-ний үйл явдал болж байхад та Хууль зүйн сайд байсан шүү. Олон хүнийг гайхшруулсан энэ зүйлд та цэг тавих ёстой. Би таныг хамгийн шударга хүн гэж боддог. Би таниас олон зүйл суралцах ёстой, би таныг хамгийн их хүндэтгэдэг. Гэтэл та яагаад ийм ац юм оруулж улстөрийн даалгавар биелүүлж байгаа юм.

Б.Жаргал