Засгийн газрын хуралдаанаас гаргасан шийдвэрийг танилцууллаа. Энэ үеэр “Зарим төрлийн төрийн хяналт шалгалтын үйл ажиллагааг түр зогсоох тухай” хуулийн талаар Хууль зүй, дотоод хэргийн сайд Х.Нямбаатар сайд мэдээллээ.  Тэрбээр “Шинэ сэргэлтийн бодлогын хүрээнд батлах хэд хэдэн хууль тогтоомжуудын жагсаалтыг УИХ-ын тогтоолоор баталсан. Энэ хүрээнд бид бүхэн  “Зарим төрлийн төрийн хяналт шалгалтын үйл ажиллагааг түр зогсоох тухай” хуулийн төслийн УИХ-д өргөн мэдүүлэхээр боллоо.

Энэ хууль үйлчлэл 2022 оны хоёрдугаар сарын  1-ны өдрөөс 2024 оны арванхоёрдугаар сарын 31-ны өдөр хүртэл буюу эдийн засгийн бодлогыг эрчимжүүлэх зорилгоор  гурван жилийн хугацаатай үйлчлэхээр болсон.    Төрийн хяналт  шалгалтын тухай хуульд тухайн төрөл чиглэлийн төлөвлөгөөт хяналт чиглэлийг жил бүр зохион байгуулахаар төлөвлөгдсөн байдаг. Энэ нь аж ахуй эрхлэгчид, бизнес эрхлэгчдийн үйл ажиллагаанд ихээхэн чирэгдэл учруулдаг гэж бизнес эрхлэгчид нийгмийн сүлжээнд удаа дараа илэрхийлж байсан. Төлөвлөгөөт хяналт шалгалтын хүрээнд зогсоогдож байгаа хяналт шалгалтад Монгол банкны, Санхүүгийн зохицуулах хорооны, Гааль татварын, Эрүүл мэнд нийгмийн даатгалын, хүүхэд хамгааллын чиглэлийн хяналт шалгалт зогсохгүй. Үүнээс бусад хяналт шалгалтууд энэ хууль батлагдсанаар гурван жилийн хугацаанд зогсооно. Гэхдээ мэргэжлийн хяналт шалгалтын байгууллагад ирж буй санал гомдлын дагуу хяналт шалгалт хийнэ. Зарим төрлийн төрийн хяналт шалгалтын үйл ажиллагааг түр зогсоох нь төр өөрөө хяналт шалгалтаар иргэн аж ахуйн үйл ажиллагаанд хүндрэл чирэгдэл учруулж байгааг хөнгөвчилж байгаа боловч нөгөө талдаа төрийн шалган туслах, зөвлөн туслах чиг үүрэг хадгалагдан үлдэж байгаа” гэлээ.

Д.Батчулуун