Өнөөдөр Анхдугаар шинэ Үндсэн хуулиа баталсаны 30 жилийн ойн өдөр тохиож байна. Энэ өдрийг тохиолдуулан УИХ-ын Хүндэтгэлийн чуулган болж байна. Хуралдааны эхэнд УИХ-ын дарга Г.Занданшатарын мэндчилгээний хэлсэн үгнээс онцолж хүргэе. Тэрбээр “Монгол Улсын нийт ард иргэд ээ, эрхэм зочид оо. Та бүхэнд Монгол Улсын Ардчилсан шинэ үндсэн хуулийн 30 ойн баярыг мэндийг өргөн дэвшүүлье. Бидний монголчууд төрт ёс, хууль цаазны олон мянган жилийн түүхэн уламжлалтай ард түмэн билээ. Их Монгол Улсын төрийн үндсэн гол хууль, Их засаг 800 зууны нэгэн зууны, Бүгд найрамдах Монгол Улсаа тунхаглан зарласан Анхдугаар үндсэн хууль нэгэн зууны түүхтэй. Харин эдүгээгээс яг 30 жилийн өмнө морин цагт Монгол Улсын Ардчилсан шинэ үндсэн хуулийг Ардын их хурлын 12 дахь удаагийн сонгуулийн хоёрдугаар чуулганаар баталсан шинэ түүхтэй, ардчилсан чөлөөт Монгол Улсын ард иргэд та бид билээ. Монголын ард түмэн бид улсынхаа тусгаар тогтнол, бүрэн эрхт байдлыг бэрхжүүлж, хүний эрх, эрх чөлөө, шударга ёс, үндэснийхээ эв нэгдлийг эрхэмлэн дээдэлж, төрт ёс, түүх соёлынхоо уламжлалыг нандигнан өвлөж, хүн төрлөхтөний соёл иргэншлийг ололтыг хүндэтгэн үзэж, эх орондоо хүмүүнлэг иргэний ардчилсан нийгмэм цогцлуулан хөгжүүлэхийг эрхэм зорилгоо болгосон, Монгол Улсын Үндсэн хуулийг даяар олноо зарлан тунхагласан. Түүхийг хүмүүс бүтээдэг. Гэхдээ хүн бүхэн бүтээгч байж чаддаггүй. Харин 30 жилийн өмнө Монгол Улсын зорин тэмүүлэх шинэ замын эхлэлийг тавьж, шинэ ирээдүйн бамбарыг асаасан Ардчилсан шинэ үндсэн хуулийг баталсан хууль тогтоогчид, Ардын их хурлын 430 депутат, Улсын бага хурлын гишүүд, тэдний ар талд зохион байгуулж, туслалцаа үзүүлж ажилласан Улсын бага хурал Ерөнхийлөгч Засгийн газрын ажилтнууд сэтгэл итгэлээ зориулан ажилласан олон мянган хүмүүс бол жинхэнэ ёсоор түүх бүтээгчид юм. Монголын шинэ түүхийг бүтээн туурвигч та бүхэндээ тэгш дүүрэн 30 жилийн ойн баярын мэндчилгээг УИХ-ын нэрийн өмнөөс болон хувиасаа дэвшүүлж, ажил үйлсийн өрнүүн амжилт, амьдарлын баяр жаргал, эрүүл энхийг хүсэн ерөөе. Түүхийн эгзэгтэй цаг үеүдэд монголчууд эв саналаа нэгтгэж, нэгэн зүгт зориглон хөдөлж, эрхэм чанараараа тухайн үеийн МАХН шинэ улстөрийн нам, эвсэлүүд Монголын нийт ард түмэн зорилго тэмүүлэлээ нэгтгэн зөвшилцөл, ойлголцолыг бүрдүүлэн зүтгэсний хүчинд Шинэ үндсэн хууль батлагдсан. 30 жилийн ойн өдөр Үндсэн хууль маань хэрхэн батлагдсан талаарх түүхийг товчхон сөхөх нь залуу хойч үеийнхэнд түүхэндээ бодитойгоор хандахад ач холбогдолтой хэмээн үзэж байна” хэмээв. 

Б.Жаргал