Үндсэн хууль ба намын асуудлаар Ардчилсан намын ерөнхий нарийн бичгийн дарга Ч.Өнөрбаяр мэдээлэл хийлээ. Тэрбээр “Иргэний нийгмийн байгууллагыг хэн нэгэн дарга захирамжаар байгуулдаггүй. Харин иргэд сайн дураараа эвлэлдэн нэгдэж байгуулдаг. Иргэний нийгмийн байгууллагууд төрийн сөрөг хүчин болдог.

Гэтэл иргэний нийгмийн тухай хуулийг хийхдээ үйл ажиллагааг нь дэмжих тухай хуулийг хийж чадаагүй. Холбооны тухай хуулиар иргэний нийгмийг амьгүй болгох гэж байна.  Иргэний нийгэм өөрөө төрийг хянадаг биш, төрийн дагалдагч хэрэгслүүд болох гэж байна. Өнөөдөр УИХ-ын гишүүн, төрийн тэргүүн болчхоод иргэний нийгмийн байгууллага, төрийн бус байгууллагын тэргүүнээр ажилладаг моод Монголд дэлгэрсэн. Үүнийгээ одоо боль. Нэг бол Монгол төрийн сайдын ажлаа хий, үгүй бол боксын холбоогоо удирд. Ийм л зарчим бий. Харамсалтай нь энэ зүйлүүдэд ухралт хийгээд байгаа юм.

Үндсэн хуулийн 30 жилийн түүхийг харахад хууль баталсан процесс дийлэнхдээ Үндсэн хуулийнхаа эсрэг явж байсан. УИХ-ын бүтэц бүрэлдэхүүнийг л бид хуульчилсан. УИХ иргэдтэй ойрхон байхыг хуульчилж чадаагүй. Ерөнхий сайд нэг удаа Монгол улсад хүний эрх, эрх чөлөөтэй холбоотой хуулийн биелэлтийн асуудлаар ард түмэнд тайлан тавьсангүй. Үүнд төсөв мөнгө хэрэггүй, харин санал санаачилга л хэрэгтэй. Эрх барьж байгаа нам ачааныхаа хүндийг үүрэх хэрэгтэй. Мөн Монгол Улсын Ерөнхийлөгч Үндсэн хуульдаа үнэнч байна, Монголын ардчиллыг хамгаална, монгол хүний эрх чөлөөний төлөө зогсоно гэж тангараг өргөсөн. Тангаргаа умартсан ерөнхийлөгчийг огцруулдаг нь манай Үндсэн хуулийн зарчим шүү” гэлээ.

Д.Батчулуун