УИХ-ын хуралдааны эхэнд УИХ-ын гишүүн Б.Пүрэвдорж үг хэллээ. Тэрбээр “Өнөөдөр эрчим хүч атгасан улс орнууд дэлхийд хамгийн өндөр хөгжилтэй байгаа. Их долоо гэж ярьдаг долоон улс дэлхийн нийт хүн амын 10 хувийг эзэлдэг мөртлөө эрчим хүчний 90 хувийг үйлдвэрлэдэг. Түүнийгээ хэрэглэдэг. Тийм ч учраас хөгжлөөрөө тасраад алга болсон. Манай улс эрчим хүчний маш арвин нөөцтэй. Тэрхүү нөөцөө ашиглах нь  зүйтэй. Бид нар гаднаас эрчим хүчний харьяат байж болохгүй. Монгол улсын төрийн бодлого гарчихсан  Эрдэнэ бүрэнгийн  усан цахилгаан  станцын талаарх  их хурлын шийдвэрийг эсэргүүцээд явж байгаа хэсэг бүлэг нөхдүүдэд төрийн төмөр нүүрийг харуулах хэрэгтэй. Тэнд эсэргүүцэж байгаа ард түмэн байж болно. Тэдний эрх. Харин төрийн шийдвэрийг орон нутагт хүргэх ёстой төрийн алба хашиж байгаа хүмүүс Засгийн газрын шийдвэрийн эсрэг тогтоол гаргах нь хариуцлагагүй зүйл. Баруун таван аймгийн ард түмний амьдралд маш хэрэгтэй Эрдэнэ бүрэнгийн усан цахилгаан станцыг гацаад байгаа нөхдүүдийг илрүүлэх хэрэгтэй. Тэдэнд төрийн төмөр нүүрийг харуул.

Их хурал сүүлийн үед хийж байгаа зүйл алга. Бидний санаачилсан тэтгэврийг долоон жил биш, таван жилийн цалингийн дунджаар тогтоох хуулийн төслийг яаралтай хэлэлцэж өгөөч. Багц хуульдаа хэлэлцэнэ гээд алга болчихлоо. Хаврын чуулганаар хэлэлцэхгүй алга болно. Цагаан сар болох гэж байна. Ахмадууддаа бэлэг бариад энэ хуулийн төслийг эрх долоо хоногт хэлэлцэж өгөхийг хүсэж байна” гэлээ.

Д.Батчулуун