Гэр хороолол хөдөлгөөнөөс тус хөдөлгөөний тэргүүн Э.Бат-Үүлийн талаар мэдээлэл хийлээ. Энэ үеэр Гэр хороолол хөдөлгөөний удирдах зөвлөлийн гишүүн Д.Мөнгөнцэцэг үг хэллээ. Тэрбээр “Гэр хороолол хөдөлгөөнөөс  Э.Бат-Үүл, С.Амарсайхан нарыг шалгуулах хүсэлтэй байгаа.  Э.Бат-Үүл гэдэг хүн гэр хорооллын хөдөлгөөн хийсний үндсэн дээр ял авсан гэж иргэд бодоод байгаа. Гэвч үгүй. Энэ хүн 1,3 тэрбум төгрөгийг идэж уугаагүй, баримт ч байхгүй. Шүүхээр тогтоогдоогүй.  Дэд бүтцэд зарцуулсан 1,3 их наяд төгрөгийг түүнд чихэж байна. Түүний данс руу, хүүгийнх нь данс руу орсон зүйл байхгүй юм билээ. Тогтоогдоогүй зүйлд  хууль бус мэдэгдэл хийж байна.  Өнөөдөр Э.Бат-Үүл гэдэг хүний хэвлэн нийтлэх эрхийг хаасан. Энэ хүн Баабар.мн дээр өөрийн нийтлэлээ бичдэг байсан. Энэ бол хууль бус үйлдэл. Мөн нийслэл хэдэн төгрөгөөр хохирсныг хэн ч тогтоогоогүй. Ийм байдлаар хүнийг гүтгэх хэрэггүй. Хэрэв прокурорын хэлснээр тухайн засаг даргыг бодлого үйл ажиллагааных нь төлөө ялладаг юм бол өнөөдрийн Д.Сумъяабазарыг хүртэл яллах хэрэгтэй. Ардын намынхан ийм жишгийг өөрсдөө тогтоосон. Мөн өнөөдөр Таван толгой түлш  ХК гэж дарангуйллын компани бий болчихсон. Камер дагуулж ороод ядарсан иргэдийг бүлтэлзүүлж байна. Төрд гарсан хүмүүс баян болоод ядарсан иргэдийн амьдралыг мэдэхгүй байна. Сайжруулсан түлш авах мөнгөгүй байгаа иргэд өмд гутлаа түлэхгүй гээд яах юм. Ардын намынхан энэ төрийг дарангуйлна гэдэгтээ бат итгэсэн учраас намайг хэн хэлхэв, нохойг хэн саахав болчихжээ. Энэ шударга бус зүйлүүдэд гэр хорооллынхон тэмцэх хэрэгтэй байна” гэв.