Хууль бус газар олголтын тухай Хан-Уул дүүргийн ИТХ-ын төлөөлөгч Б.Жагар мэдээлэл хийлээ. Мөн БОАЖЯ-ны сайд Н.Уртнасанд шаардлага хүргүүллээ. Тэрбээр “Байгаль орчны сайд Н.Уртнасан өнөөдөр алга. Тэр хүн тусгай мөрдлөгөө хийгээд, дроноо унаад айлуудын яндан дээгүүр нисэж явж байгаа юм шиг байна. Өнөөдөр би Байгаль орчны эсрэг яамны сайд Н.Уртнасанд шаардлага хүргүүлж байна. Тухайлбал, Хан-уул дүүргийн 11-р хорооны нутаг дэвсгэр буюу Зайсангийн аманд байрлах 3,5 га газрыг дахин өөр ААН-үүдэд газар ашиглах гэрчилгээ олголгүй, нийтийн эзэмшилд авч,  мод тарьж, ногоон байгууламж байгуулах замаар ногоон дуу хоолой аянд нэгдэхийг хүссэн албан бичгийг аравдугаар сард явуулсан боловч хариу өгөөгүй. Өдий болтол хариу өгөөгүй байгаа нь  Үндсэн хуулийн 16-ийн 12 дугаар зүйлийг зөрчиж буй тул хуулийн дагуу хариу өгөхийг шаардаж байна” гэсэн шаардлага хүргүүлжээ. Мөн “Байгаль орчны эсрэг яам өнөөдөр ядарсан иргэдээ мөрдөж, шөнө унтуулахгүй дроноор нисэж, зугаалж цэнгэж явах хооронд иргэдийн амьсгалах агаар үгүй болж байна. Энэ Н.Уртнасан сайдын жаргал нь багаддаг юм уу. Мэдэхгүй. Шөнө өдөргүй айлуудын цонх тогшоод, дээгүүр нь нисээд байдаг. Байгаль орчны яам олигархуудын яам болон хувирсан гэдгийг албан ёсоор цохож хэлье” гэв.