Зам, тээврийн хөгжлийн яам, Гадаад харилцааны яам болон Боомтын зөвлөл хамтран Замын-Үүд авто замын боомтын ачаа тээврийн асуудлаар мэдээллээ. Энэ үеэр Зам тээврийн хөгжлийн яамны хэлтсийн дарга Г.Гантулга мэдээлэл өглөө. Тэрбээр “Хятадын талаас тавьсан шаардлагын дагуу Замын-үүд дээр Монгол жолооч нараа зохион байгуулалтад оруулаад, халдвар хамгааллын дэглэмийг сахиулж байсан. Гэсэн ч бид нарын зохион байгуулалт, жолооч нарын хариуцлагагүй байдлын үүднээс халдвар алдсан. Үүнээс болж Хятадын тал хилээ хаах хүртэл арга хэмжээ авсан. Гурван сар орчим зогссон. Энэ нь олон хүний эрх ашиг хөндөгдөж байгаа учраас Хятадын саналын дагуу тээвэрлэлт хийж байгаа. Тухайлбал, Зэвсэгт хүчнээс тусгай зориулалтын, мэргэшсэн жолооч нарыг гаргаад тээвэрлэлт хийж байгаа. Замын-Үүд, Логистикийн төвөөс Улаанбаатар хүртэл тээвэрлэлт хийхэд нээлттэй. Харин хилийн шугамын 0 цэгээс Логистикийн төв хүртэл гурван километрийн зайд халдвар хамгаалалын дэглэмээ чанд сахин тээвэрлэлт хийх жолоочийг Засгийн газраас гаргаж ажиллуулж байгаа” гэлээ.