УИХ-ын чуулганы хуралдаанаар БОАЖЯ-ны сайд томилох тухай асуудлыг хэлэлцэж байна.Энэ үеэр УИХ-ын гишүүн Б.Пүрэвдож үг хэлж, асуулт асуулаа. Тэрбээр “Ковидын нөхцөл байдлаас шалтгаалаад бүх улсын эдийн засаг хүндэрч байгаа. Гэхдээ манай гол нэрийн бүтээгдэхүүн болсон алт, зэс, нүүрсний үнэ өссөн. Гэтэл ковидын нөхцөл, хил гаалийн асуудлаас шалтгаалаад зэсийн баяжмал хоёр сар экспортод гарсангүй. Нүүрс 1700,1800 машин гардаг байсан бол одоо 70 ширхэг машин гарч байна.  Энэ ойрдоо сайжрахгүй юм байна. Алтыг экспортод гаргах боломж байна. Алтыг онгоцоор эцсийн хэрэглэгчид нь шууд хүргээд өгчихнө. Хамгийн орчин үеийн тоног төхөөрөмж ашиглаад үйлдвэрээ байгуулсан. Тэр нь байгальд ээлтэй. Гэсэн ч албан тушаалтнууддаа зөвшөөрөл өгдөггүй хэд хэдэн төслүүд байгаа. Ард иргэдийнхээ төсвийн хүндрэлийг дээшлүүлэхийн тулд энэ төслүүдээ хэрэгжүүлэх үү? Эсвэл юу ч хийдэггүй, дээшээ харсан сайд байх юм уу? Үүнд та ямар байр суурьтай байна вэ?

УИХ-ын гишүүн Б.Пүрэвдоржийн асуултад БОАЖЯ-ны сайдад нэр дэвшигч Б.Бат-Эрдэнэ хариулт өглөө. Тэрбээр “Монгол Улсын урт хугацааны хөгжлийн хөтөлбөр болох “Алсын хараа 2050”-д ногоон хөгжилтэй холбоотой дөрвөн зүйл тусгагдсан байдаг. Тухайлбал,эх байгаль эко систем, байгалийн баялагын үр өгөөж, үнэт баялаг ус, хүлэмжийн хийг багасгах, хүртээмжийг нэмэгдүүлэх гэсэн хөгжлийн хөтөлбөр тусгагдан байдаг. Үүний хүрээнд байгалийн баялагын үр өгөөжтэй асуудал дээр тодорхой хэмжээнд техник, технологийн дэвшлийг гаргаж ашиглаж байгаа төслүүдтэй танилцах, төслүүдийг урагшлуулах, ААН-үүдээ дэмжих гэдэг байр суурийг барьж ажиллана” гэв.

Д.Батчулуун