МАН-ын Удирдах зөвлөлийн өнөөдрийн хуралдаанаар улс төрийн томилгоонуудыг танилцуулж, хэлэлцжээ. Өчигдөр Засгийн газрын ээлжит бус хуралдаанаар ажлаас нь чөлөөлсөн Байгаль орчин, аялал жуулчлалын дэд сайд Ц.Батбаярын оронд Г.Түвдэндоржийг томилохоор болсон бол шинээр байгуулагдаад буй Эдийн засаг, хөгжлийн яамны дэд сайдаар С.Наранцогтыг томилохоор болсон байна. С.Наранцогтын хувьд өдгөө Сангийн яамны Төрийн нарийн бичгийн даргаар ажиллаж буй, Дундговь аймгийн гаралтай нэгэн.

Эдийн засаг, хөгжлийн яам нь Хөгжлийн бодлого, төлөвлөлт, Макро эдийн засгийн бодлого, төлөвлөлт, Бүс нутаг, аж үйлдвэр, инновацын нэгдсэн бодлого, төлөвлөлт, Хөгжлийн санхүүжилтийн нэгдсэн бодлого, төлөвлөлт, Хөрөнгө оруулалтын бодлого, Концесс, төр хувийн хэвшлийн түншлэл, Худалдаа, эдийн засгийн нэгдсэн бодлого, төлөвлөлт хариуцсан нэгжүүдээс бүрдсэн нийт долоон газар, найман хэлтэстэйгээр үйл ажиллагаагаа 2022 оны нэгдүгээр сарын 06-нд эхлүүлээд байсан билээ.

С.Сүлд